rah-numa ban jaun

dard jis dil meñ ho us dil kī davā ban jā.ūñ

koī bīmār agar ho to shifā ban jā.ūñ

dukh meñ hilte hue lab kī maiñ duā ban jā.ūñ

uf vo āñkheñ ki haiñ bīnā.ī se mahrūm kahīñ

raushnī jin meñ nahīñ nuur jin āñkhoñ meñ nahīñ

maiñ in āñkhoñ ke liye nūr-e-ziyā ban jā.ūñ

haa.e vo dil jo taḌaptā huā ghar se nikle

uf vo aañsū jo kisī dīda-e-tar se nikle

maiñ us aañsū ke sukhāne ko havā ban jā.ūñ

duur manzil se agar raah meñ thak jaa.e koī

jab musāfir kahīñ raste se bhaTak jaa.e koī

ḳhizr kā kaam karūñ rāh-numā ban jā.ūñ

umr ke bojh se jo log dabe jaate haiñ

nā-tavānī se jo har roz jhuke jaate haiñ

un za.īfoñ ke sahāre ko asā ban jā.ūñ

ḳhidmat-e-ḳhalq kā har samt meñ charchā kar duuñ

mādar-e-hind ko jannat kā namūna kar duuñ

ghar kare dil meñ jo 'afsar' vo sadā ban jā.ūñ

dard jis dil mein ho us dil ki dawa ban jaun

koi bimar agar ho to shifa ban jaun

dukh mein hilte hue lab ki main dua ban jaun

uf wo aankhen ki hain binai se mahrum kahin

raushni jin mein nahin nur jin aankhon mein nahin

main in aankhon ke liye nur-e-ziya ban jaun

hae wo dil jo taDapta hua ghar se nikle

uf wo aansu jo kisi dida-e-tar se nikle

main us aansu ke sukhane ko hawa ban jaun

dur manzil se agar rah mein thak jae koi

jab musafir kahin raste se bhaTak jae koi

KHizr ka kaam karun rah-numa ban jaun

umr ke bojh se jo log dabe jate hain

na-tawani se jo har roz jhuke jate hain

un zaifon ke sahaare ko asa ban jaun

KHidmat-e-KHalq ka har samt mein charcha kar dun

madar-e-hind ko jannat ka namuna kar dun

ghar kare dil mein jo 'afsar' wo sada ban jaun