rah-rau

subuk-pā havā kī tarah maiñ guzartā rahā

subuk-pā havā kī kahīñ koī manzil nahīñ

havā be-karāñ vaqt kī mauj azal se tarastī rahī

kahīñ pal ko sustā sake so sake

magar duur hadd-e-nazar ik dhundalkā thā ab bhī dhundalkā hai sāhil nahīñ

mujhe zindagī ik ḳhalish ban ke Dastī rahī

kabhī aisī manzil na aa.ī jahāñ koī taaza nafas ho sake

har ik dhundlī manzil se pahle nayā rāsta hī ubhartā rahā

kabhī jalte phūloñ kī nau-ḳhez ḳhushbueñ dil meñ dahaktī rahīñ

kabhī ḳhushk jhulsī huī Tahniyāñ abr-pāroñ ko hasrat

se taktī rahīñ

vo kuchh mujh se kahne ko thiiñ aur jhijaktī rahīñ

kabhī sukh ke saa.e kabhī dukh ke dariyā mirā dil machaltā rahā

kahīñ phaile maidāñ kahīñ saḳht ūñchī chaTānoñ ke

uljhe hue silsile

magar merī manzil yahāñ bhī nahīñ thī vahāñ bhī nahīñ

maiñ chalne pe majbūr chaltā rahā

maiñ har baar kuchh bhuul aayā huuñ pīchhe kahīñ

yūñhī jaise ḳhud rah gayā huuñ kasī phuul ke paas

chalte hue

subuk-pa hawa ki tarah main guzarta raha

subuk-pa hawa ki kahin koi manzil nahin

hawa be-karan waqt ki mauj azal se tarasti rahi

kahin pal ko susta sake so sake

magar dur hadd-e-nazar ek dhundalka tha ab bhi dhundalka hai sahil nahin

mujhe zindagi ek KHalish ban ke Dasti rahi

kabhi aisi manzil na aai jahan koi taza nafas ho sake

har ek dhundli manzil se pahle naya rasta hi ubharta raha

kabhi jalte phulon ki nau-KHez KHushbuen dil mein dahakti rahin

kabhi KHushk jhulsi hui Tahniyan abr-paron ko hasrat

se takti rahin

wo kuchh mujh se kahne ko thin aur jhijakti rahin

kabhi sukh ke sae kabhi dukh ke dariya mera dil machalta raha

kahin phaile maidan kahin saKHt unchi chaTanon ke

uljhe hue silsile

magar meri manzil yahan bhi nahin thi wahan bhi nahin

main chalne pe majbur chalta raha

main har bar kuchh bhul aaya hun pichhe kahin

yunhi jaise KHud rah gaya hun kasi phul ke pas

chalte hue