rasta bulata hai

rang bujhne lage haiñ āñkhoñ meñ

buildiñgeñ jugnuoñ sī lagtī haiñ

chāñd taare kahāñ haiñ kyā mā'lūm

laḌkiyāñ phuul se badan vaalī

ik zarā paas se guzartī huī

jo mirā dard baañT letī haiñ

so chukī hoñgī apnī qabroñ meñ

ab kahīñ zindagī kā naam nahīñ

bhuuk ne paañv bāñdh rakkhe haiñ

phir bhī chalne pe huuñ ba-zid ki abhī

chañd lāsheñ haiñ hasratoñ kī jinheñ

sub.h se pahle dafn karnā hai

bojh kuchh kam ho to kahīñ baiThūñ

aur phir baiThe-baiThe so jā.ūñ

phir koī ḳhvāb dekhūñ kal ke liye

abhī ik roz aur jiinā hai

rang bujhne lage hain aankhon mein

buildingen jugnuon si lagti hain

chand tare kahan hain kya ma'lum

laDkiyan phul se badan wali

ek zara pas se guzarti hui

jo mera dard banT leti hain

so chuki hongi apni qabron mein

ab kahin zindagi ka nam nahin

bhuk ne panw bandh rakkhe hain

phir bhi chalne pe hun ba-zid ki abhi

chand lashen hain hasraton ki jinhen

subh se pahle dafn karna hai

bojh kuchh kam ho to kahin baiThun

aur phir baiThe-baiThe so jaun

phir koi KHwab dekhun kal ke liye

abhi ek roz aur jina hai