rasta jo ujalon ki taraf jata hai

rāsta vo jo ujāloñ kī taraf jaatā hai

ḳhūbsūrat se ḳhayāloñ kī taraf jaatā hai

us taraf jā na sakī thī vo bhaTak jaane se

ghir ke sau tarah kī ḳhvāhish meñ bahak jaane se

kaise daldal meñ thī vo kaise ghane ban meñ thī

kaisī mushkil meñ thī kis tarah kī uljhan meñ thī

raah pur-ḳhār thī bachnā thā kaThin dāman kā

choT aa.ī vo burā haal huā tan man kā

vo pareshān thī ghere the use Dheroñ ġham

thā yaqīñ us ko ġhalat raah pe haiñ us ke qadam

DhūñDne par use vo raah nazar aa hī ga.ī

ek din manzil-e-maqsūd ko vo pā hī ga.ī

raah mil jaane se hairān-o-hirāsāñ dil ko

ik tasallī milī muddat se pareshāñ dil ko

raat kuchh yuuñ shab-e-mahtāb huī hai us kī

ruuh ik umr meñ sairāb huī hai us kī

mushkil un ke liye āsān huā kartī hai

rāstoñ kī jinheñ pahchān huā kartī hai

rasta wo jo ujalon ki taraf jata hai

KHubsurat se KHayalon ki taraf jata hai

us taraf ja na saki thi wo bhaTak jaane se

ghir ke sau tarah ki KHwahish mein bahak jaane se

kaise daldal mein thi wo kaise ghane ban mein thi

kaisi mushkil mein thi kis tarah ki uljhan mein thi

rah pur-KHar thi bachna tha kaThin daman ka

choT aai wo bura haal hua tan man ka

wo pareshan thi ghere the use Dheron gham

tha yaqin us ko ghalat rah pe hain us ke qadam

DhunDne par use wo rah nazar aa hi gai

ek din manzil-e-maqsud ko wo pa hi gai

rah mil jaane se hairan-o-hirasan dil ko

ek tasalli mili muddat se pareshan dil ko

raat kuchh yun shab-e-mahtab hui hai us ki

ruh ek umr mein sairab hui hai us ki

mushkil un ke liye aasan hua karti hai

raston ki jinhen pahchan hua karti hai