رات اور دن کیسے ہوتے ہیں

ٹیچر نے یہ پوچھا آ کر

رات اور دن ہوتے ہیں کیوں کر

اپنی سیٹ پہ پپو اٹھا

اور فراٹے سے یوں بولا

یہ سورج اک روشن شے ہے

نارنگی سی گول زمیں ہے

دھرتی اپنی کیل پہ چکر

کھاتی رہتی ہے ہر دم سر

چوبیس گھنٹوں میں اک پھیرا

کرتی ہے یہ دھرتی پورا

چکر کھانے میں جو حصہ

سورج کی جانب ہے رہتا

اس حصہ میں دن رہتا ہے

ناوکؔ نے یوں ہی لکھا ہے

اس کی الٹی سمت اندھیرا

آدھے حصے میں ہے رہتا

یعنی رات وہاں رہتی ہے

مجھ کو تو معلوم یہی ہے