raat aur din

maiñ ne mahsūs kiyā hai to khulī haiñ āñkheñ

maiñ ne mahsūs kiyā hai to jale haiñ ye charāġh

ye charāġhāñ ye chaman kaise mile un se najāt

saañs lene ko Thahar jaao to jaadū kā hisār

har taraf shola-zabāñ naag haiñ phan jhūmte haiñ

sar uThāte haiñ na.e raag na.ī rāgniyāñ

paañv paḌte haiñ gale paḌte haiñ anjāne ḳhayāl

kyā mire paas magar ek thakan ek umañg

ek jiine kī lagan ek mohabbat kā lahū

na añdhere na ujāle se adāvat hai mujhe

raat hai din hai magar mujh ko to donoñ se hai kaam

kaam jhūTā ho to pahchānñe vaale bhī ka.ī

rañg sachche bhī na hoñ log burā mānte haiñ

chaltī-phirtī haiñ darīchoñ meñ ka.ī tasvīreñ

kyā karūñ maiñ tirī duniyā hai mirī āñkheñ haiñ

raat aur din meñ koī farq nahīñ hai aisā

maiñ ne mahsūs kiyā hai to khulī haiñ āñkheñ

maiñ ne mahsūs kiyā hai to jale haiñ ye charāġh

main ne mahsus kiya hai to khuli hain aankhen

main ne mahsus kiya hai to jale hain ye charagh

ye charaghan ye chaman kaise mile un se najat

sans lene ko Thahar jao to jadu ka hisar

har taraf shola-zaban nag hain phan jhumte hain

sar uThate hain nae rag nai ragniyan

panw paDte hain gale paDte hain anjaane KHayal

kya mere pas magar ek thakan ek umang

ek jine ki lagan ek mohabbat ka lahu

na andhere na ujale se adawat hai mujhe

raat hai din hai magar mujh ko to donon se hai kaam

kaam jhuTa ho to pahchanne wale bhi kai

rang sachche bhi na hon log bura mante hain

chalti-phirti hain darichon mein kai taswiren

kya karun main teri duniya hai meri aankhen hain

raat aur din mein koi farq nahin hai aisa

main ne mahsus kiya hai to khuli hain aankhen

main ne mahsus kiya hai to jale hain ye charagh