raat

dayār-e-shab hai ki ik peḌ kaale pattoñ kā

ki jis ke saa.e tale sub.h se bhaTakte badan

dukhoñ kī chādaroñ meñ ḳhvāb bo ke so.e haiñ

vo ḳhvāb jin kī ta.abīroñ

pe dastaras hī nahīñ

vo ḳhvāb jo ki faqat

siyāhiyoñ meñ palte haiñ

vo ḳhvāb jo ki har ik sub.h-o-shām saath chaleñ

vo ḳhvāb jo ki har ik sub.h-o-shām saath raheñ

mire vo ḳhvāb kabhī jhilmilāte aañsū haiñ

kabhī vo mahz siyāh rāstoñ ke jugnū haiñ

magar

ye ḳhvāb bhī na hoñ to zindagī kyā hai

dayar-e-shab hai ki ek peD kale patton ka

ki jis ke sae tale subh se bhaTakte badan

dukhon ki chadaron mein KHwab bo ke soe hain

wo KHwab jin ki tabiron

pe dastaras hi nahin

wo KHwab jo ki faqat

siyahiyon mein palte hain

wo KHwab jo ki har ek subh-o-sham sath chalen

wo KHwab jo ki har ek subh-o-sham sath rahen

mere wo KHwab kabhi jhilmilate aansu hain

kabhi wo mahz siyah raston ke jugnu hain

magar

ye KHwab bhi na hon to zindagi kya hai