raat ki rani

koī dekhe to zarā raat kī raanī kā jamāl

ruḳh pe ġhāze kī mahak itr meñ ālūda libās

allah allāh ye hai phuul bhī kitnā ḳhud-bīñ

husn-o-ra.anā.ī kā kis darja ise hai ehsās

marmarīñ rang subuk jism dahan chhoTā sā

lambī gardan kisī mai-kash kī surāhī jaise

shāḳh-e-nāzuk pe chamaktā hai shab-e-rangīñ meñ

kisī TuuTe hue taare kī tajallī jaise

din ke auqāt meñ ye phuul nahīñ khiltā hai

raat ke vaqt hī iThlātā hai ye sīmīñ-tan

shab ke parde hī meñ kartā hai ye ārā.ish-e-ruḳh

is kī zulfoñ se mahak uThte haiñ gulzār-o-chaman

din meñ dekhe to koī us kī pareshāñ-hālī

chehra utrā huā ḳhāmosh fasurda muñh band

koī doshīza hai jo rahtī hai din meñ ġhamgīñ

shab ke aate hī ye ho jaatī hai lailā ḳhursand

din meñ ye malgaje kapḌoñ meñ nazar aatī hai

raat meñ kartī hai ārā.ish-e-zulf-o-ruḳhsār

din meñ rahtī hai ye nāzūra-e-gul parde meñ

raat ke vaqt dikhātī hai javānī kī bahār

apne āshiq se mulāqāt kī ḳhātir dam-e-shab

kunj-e-gulshan meñ pasand aa.ī rihā.ish is ko

mujh ko is phuul pe shīrīñ kā gumāñ hotā hai

apne farhād se hai vasl kī ḳhvāhish is ko

koi dekhe to zara raat ki rani ka jamal

ruKH pe ghaze ki mahak itr mein aaluda libas

allah allah ye hai phul bhi kitna KHud-bin

husn-o-ranai ka kis darja ise hai ehsas

marmarin rang subuk jism dahan chhoTa sa

lambi gardan kisi mai-kash ki surahi jaise

shaKH-e-nazuk pe chamakta hai shab-e-rangin mein

kisi TuTe hue tare ki tajalli jaise

din ke auqat mein ye phul nahin khilta hai

raat ke waqt hi iThlata hai ye simin-tan

shab ke parde hi mein karta hai ye aaraish-e-ruKH

is ki zulfon se mahak uThte hain gulzar-o-chaman

din mein dekhe to koi us ki pareshan-haali

chehra utra hua KHamosh fasurda munh band

koi doshiza hai jo rahti hai din mein ghamgin

shab ke aate hi ye ho jati hai laila KHursand

din mein ye malgaje kapDon mein nazar aati hai

raat mein karti hai aaraish-e-zulf-o-ruKHsar

din mein rahti hai ye nazura-e-gul parde mein

raat ke waqt dikhati hai jawani ki bahaar

apne aashiq se mulaqat ki KHatir dam-e-shab

kunj-e-gulshan mein pasand aai rihaish is ko

mujh ko is phul pe shirin ka guman hota hai

apne farhad se hai wasl ki KHwahish is ko