raat

āñdhiyāñ āsmānoñ kā nauha zamīñ ko sunātī haiñ

apnī gulū-gīr āvāz meñ kah rahī haiñ,

daraḳhtoñ kī chiñghāḌ

nīchī chhatoñ par ye raqs āsmānī bagūloñ kā

ūñchī chhatoñ ke tale khele jaate Darāma kā manzar hai

ye us zulm kā isti.āra hai

jo shah-e-rag se hābīl kī garm o taaza lahū ban ke ublā hai

āñdhiyoñ meñ thā ik shor-e-karb-o-balā

aur maiñ ne sunā karbalā...karbalā

raat ke saham se, an-kahe vahm se

band āñkhoñ meñ vahshat zada ḳhvāb utrā

subah aḳhbār kī surḳhiyāñ ban gayā

aandhiyan aasmanon ka nauha zamin ko sunati hain

apni gulu-gir aawaz mein kah rahi hain,

daraKHton ki chinghaD

nichi chhaton par ye raqs aasmani bagulon ka

unchi chhaton ke tale khele jate Darama ka manzar hai

ye us zulm ka istiara hai

jo shah-e-rag se habil ki garm o taza lahu ban ke ubla hai

aandhiyon mein tha ek shor-e-karb-o-bala

aur main ne suna karbalakarbala

raat ke saham se, an-kahe wahm se

band aankhon mein wahshat zada KHwab utra

subah aKHbar ki surKHiyan ban gaya