رباب غم

مرا تو یہ گمان ہے

گیان پر لگان ہے

گھٹا گھٹا سی روشنی

غبار جان سے اٹی

فسردہ کائنات کے

ابھرتے ریگزار پر

گر پڑا ہے آدمی

اور اس کے سامنے مرے

سوال کا جواب اک کٹی ہوئی زبان ہے

نوشتگان سوچ کے

گمان سے کہیں پرے

ہے چاند ایک ضو فشاں

سنو ذرا رباب غم

کوئی کہیں ہے گا رہا

خدائے آسمان کی ہے ان کہی سنا رہا

وہ کہہ رہا ہے شادباد آدمی کوئی نہیں

یہ زندگی سمجھتے ہو جسے یہ زندگی نہیں

جہان بھر کی رونقیں

سنو تو سب ہیں وحشتیں

ہیں وحشتوں کے پھل سبھی

تو اور میں تو کچھ نہیں

یہ جھوٹ کا غلاف ہے

جو ہے ہماری شان ہیچ

اگر تمہیں گمان ہو

تو کون بد گمان ہو

خیال اور گمان ہیچ

گیان پر لگان ہیچ