ریس کا گھوڑا

خود کو میں اکثر کہتا ہوں

مجھ میں اور اک ریس کے گھوڑے میں

کوئی بھی فرق نہیں ہے

جانے کتنوں نے مجھ پر وشواس کیا اور داؤ لگائے

بازی جیتے

جشن منائے

کتنے جاکی میری پیٹھ پہ بیٹھ کے

مجھ کو ایڑ لگا کے

تیز بھگا کے

اول آئے

میڈل جیتے تمغے پائے

میری دوڑ سدا ہی

اوروں کی خاطر مخصوص رہی ہے

ہاں البتہ میرے نام کا

میری نسل کا

میری جیت کا

چرچا اکثر ہوتا رہا ہے

اب مجھ کو کچھ یوں لگتا ہے

میری عمر

مری رفتار پہ حاوی ہو کر

مجھ کو اک ناکارہ گھوڑا بنا چکی ہے

اب تو نہ کوئی جاکی ہے جو میری مالش کر کے مجھے

تیار کرے

اور شاباشی دے کر ٹہلاتا

ریس کورس میں اعتماد سے لے جائے

کوئی خبر نہیں چھپتی اب اخباروں میں جیت کی میری

تھان میں بندھا

میں ہوں اک ناکارہ گھوڑا

اب تو فقط اس انتظار میں دن گنتا ہوں

کب اک گولی مجھ کو ابدی نیند سلا دے