rad

ai vādī-e-ḳhushk-o-sabz parbat

tū apnī ḳhushbū se Dar rahī hai

tire sahīfa-numā badan par

ye kaisī aayat utar rahī hai

tire fusūñ-nāk rāstoñ par

ghanerī rut kī masāfateñ haiñ

fazā.eñ pahroñ meñ baT chukī haiñ

havāoñ tak meñ adāvateñ haiñ

sukūt-e-zindāñ kī putliyoñ par

nigāh-e-tīra-nazar kā dukh hai

har ek rauzan se aatā jaatā

idhar kā dukh hai udhar kā dukh hai

farishtgān-e-vahī ke hāthoñ

se saare alfāz gir chuke haiñ

qalandarān-e-rivāyat-e-rad

ḳhud apne diiñ se hī phir chuke haiñ

baġhāvatoñ ke alam pe kanda

itā.atoñ kā nishān-e-vāqif

usuul gāhoñ ke mimbaroñ par

sharā.it-e-hukm-o-shaiḳh-o-munsif

tire tanaffus ke pesh-o-pas par

laboñ kī laġhzish gavāh jaise

tirī jabīñ par ugī lakīreñ

saf-e-shikasta sipāh jaise

so ab faqat din guzar rahe haiñ

sadā-e-zanjīr-e-mustaqil se

na raunaq-e-nau na dhuup kī lau

utar ga.ī jaan jaise dil se

sharāb āñkhoñ se ugtā jharnā

bhaTak ke rasta sā ban rahā hai

baḌhā ta.addud surūr-o-mai kā

junūn dastak ko jan rahā hai

ai vādī-e-ḳhushk-o-sabz parbat

tū apnī ḳhushbū se Dar rahī hai

tire sahīfa-numā badan par

ye kaisī aayat utar rahī hai

ai wadi-e-KHushk-o-sabz parbat

tu apni KHushbu se Dar rahi hai

tere sahifa-numa badan par

ye kaisi aayat utar rahi hai

tere fusun-nak raston par

ghaneri rut ki masafaten hain

fazaen pahron mein baT chuki hain

hawaon tak mein adawaten hain

sukut-e-zindan ki putliyon par

nigah-e-tira-nazar ka dukh hai

har ek rauzan se aata jata

idhar ka dukh hai udhar ka dukh hai

farishtgan-e-wahi ke hathon

se sare alfaz gir chuke hain

qalandaran-e-riwayat-e-rad

KHud apne din se hi phir chuke hain

baghawaton ke alam pe kanda

itaaton ka nishan-e-waqif

usul gahon ke mimbaron par

sharait-e-hukm-o-shaiKH-o-munsif

tere tanaffus ke pesh-o-pas par

labon ki laghzish gawah jaise

teri jabin par ugi lakiren

saf-e-shikasta sipah jaise

so ab faqat din guzar rahe hain

sada-e-zanjir-e-mustaqil se

na raunaq-e-nau na dhup ki lau

utar gai jaan jaise dil se

sharab aankhon se ugta jharna

bhaTak ke rasta sa ban raha hai

baDha taddud surur-o-mai ka

junun dastak ko jan raha hai

ai wadi-e-KHushk-o-sabz parbat

tu apni KHushbu se Dar rahi hai

tere sahifa-numa badan par

ye kaisi aayat utar rahi hai