radd-e-amal

tumheñ mā'lūm hī shāyad nahīñ ye

piyāla zahr kā mujh ko pilā kar

mire sach ko amar tum ne kiyā hai

salīb-o-dār par mujh ko sajā kar

bulandī bhī 'atā kī hai tumhīñ ne

kiyā jab se supurd-e-ḳhāk tum ne

guloñ kī shāḳh par khilne lagā huuñ

utārā thā jahāñ tan se mirā sar

vahāñ par aaj bhī ahl-e-vafā ke

hazāroñ saal se lagte haiñ mele

jahāñ tum ne zabāñ kaaTī thī merī

bahut bebāk lahje meñ vahāñ par

chalan ab ho gayā hai guftugū kā

jahāñ āñkheñ mirī be-nūr kī thiiñ

hue ahl-e-nazar paidā vahāñ par

mire baazū ukhāḌe the jahāñ par

vahāñ ab parbatoñ ke silsile haiñ

ḳhudā kā shukr hai tohfe kī sūrat

tumhārī zid ke sadqe dar-haqīqat

mujhe jiine kā

mauqa' mil gayā hai

tumhein ma'lum hi shayad nahin ye

piyala zahr ka mujh ko pila kar

mere sach ko amar tum ne kiya hai

salib-o-dar par mujh ko saja kar

bulandi bhi 'ata ki hai tumhin ne

kiya jab se supurd-e-KHak tum ne

gulon ki shaKH par khilne laga hun

utara tha jahan tan se mera sar

wahan par aaj bhi ahl-e-wafa ke

hazaron sal se lagte hain mele

jahan tum ne zaban kaTi thi meri

bahut bebak lahje mein wahan par

chalan ab ho gaya hai guftugu ka

jahan aankhen meri be-nur ki thin

hue ahl-e-nazar paida wahan par

mere bazu ukhaDe the jahan par

wahan ab parbaton ke silsile hain

KHuda ka shukr hai tohfe ki surat

tumhaari zid ke sadqe dar-haqiqat

mujhe jine ka

mauqa' mil gaya hai