radd-e-tashkil

ek din achānak

ka.ī lafz

munkir-nakīr kī tarah

jhapāk se merī qabr meñ ghus aa.e

aksar kī peshānī par savālāt ke achambhe the

pareshānī kī baat to thī hī

maiñ ne fauran gōgle aur wikipedia ke vāste dene shurū' kiye

bas phir kyā thā

saare lafz

mere sāmne raqs karte hue

jhaT-paT rañg-birañgī āvāzeñ pahan kar

ek dūsre se lipaT ga.e

zarā sī der meñ

saare rang aapas meñ ulajh ga.e

aur ek buDDhā ullū

ye āhanī taḳhtī mere gale meñ Daal gayā

jis par be-rang ḳhat meñ kunda hai

aaj se ye bad-baḳht darīda-dimāġh

lafzoñ par chaḌhe rang khurchā karegā

ki yahī is kī sazā hai

tab se maiñ isī mashaqqat meñ lagā huuñ

aur muntazir huuñ ki gale meñ paḌī huī taḳhtī par lagā zang mujhe kab nazar aa.egā

ek din achanak

kai lafz

munkir-nakir ki tarah

jhapak se meri qabr mein ghus aae

aksar ki peshani par sawalat ke achambhe the

pareshani ki baat to thi hi

main ne fauran google aur wikipedia ke waste dene shuru' kiye

bas phir kya tha

sare lafz

mere samne raqs karte hue

jhaT-paT rang-birangi aawazen pahan kar

ek dusre se lipaT gae

zara si der mein

sare rang aapas mein ulajh gae

aur ek buDDha ullu

ye aahani taKHti mere gale mein Dal gaya

jis par be-rang KHat mein kunda hai

aaj se ye bad-baKHt darida-dimagh

lafzon par chaDhe rang khurcha karega

ki yahi is ki saza hai

tab se main isi mashaqqat mein laga hun

aur muntazir hun ki gale mein paDi hui taKHti par laga zang mujhe kab nazar aaega