rafiq-e-nadida

ik nidā aa.ī bahut duur se kānoñ meñ mire

phir ḳhayāl aayā ki ye vahm mirā ho shāyad

mere uljhe hue ḳhvāboñ ke sanam ḳhāne haiñ

mere anfās kī mauhūm sadā ho shāyad

maiñ tasavvur ke ḳhalāoñ meñ bhaTaktā huuñ sadā

shabnamī soch kī raas aatī nahīñ mujh ko havā

jo mire shauq-e-takallum kī talabgār na ho

is se qurbat kī tamannā kā taqāzā be-sūd

ḳhvāb jo āñkhoñ meñ maj.hūl nazāra ho jaa.e

us ke sach hone kā be-ma.anī dilāsā be-sūd

be-nidā ḳhvāhish lailā se mujhe kyā hāsil

aisī nādīda zuleḳhā se mujhe kyā hāsil

kyā ḳhabar is ke taḳhayyul meñ mirā naam na ho

mujh se milne kī himāqat se vo katrā jaa.e

kyā patā merī rifāqat use manzūr na ho

mujh se mil baiThe magar jald hī uktā jaa.e

vasl māmūra-e-ehsās ke ḳhvāboñ meñ rahe

hasrat sharaf mulāqāt sarāboñ meñ rahe

kyā patā us ko mire qurb kī ḳhvāhish hī na ho

baat karnī bhī na ho us ko gavārā mujh se

kyā ḳhabar pahlī mulāqāt pe vo ye kah de

rakhnā ummīd na milne kī dobāra mujh se

ye tasavvur mire pindār se Takrāte haiñ

mere jazbāt isī ḳhauf se mar jaate haiñ

jo sadā duur se aa.ī hai faqat vahm se vo

vahm ke saa.e se ummīd lagānā hai fuzūl

dahr kī talḳh haqīqat ko nazar meñ rakh kar

ret par ḳhvāboñ kī tasvīr banānā hai fuzūl

aisī tasvīr kā har rañg utar jaatā hai

vaqt ke saath ḳhalāoñ meñ bikhar jaatā hai

ek nida aai bahut dur se kanon mein mere

phir KHayal aaya ki ye wahm mera ho shayad

mere uljhe hue KHwabon ke sanam KHane hain

mere anfas ki mauhum sada ho shayad

main tasawwur ke KHalaon mein bhaTakta hun sada

shabnami soch ki ras aati nahin mujh ko hawa

jo mere shauq-e-takallum ki talabgar na ho

is se qurbat ki tamanna ka taqaza be-sud

KHwab jo aankhon mein majhul nazara ho jae

us ke sach hone ka be-mani dilasa be-sud

be-nida KHwahish laila se mujhe kya hasil

aisi nadida zuleKHa se mujhe kya hasil

kya KHabar is ke taKHayyul mein mera nam na ho

mujh se milne ki himaqat se wo katra jae

kya pata meri rifaqat use manzur na ho

mujh se mil baiThe magar jald hi ukta jae

wasl mamura-e-ehsas ke KHwabon mein rahe

hasrat sharaf mulaqat sarabon mein rahe

kya pata us ko mere qurb ki KHwahish hi na ho

baat karni bhi na ho us ko gawara mujh se

kya KHabar pahli mulaqat pe wo ye kah de

rakhna ummid na milne ki dobara mujh se

ye tasawwur mere pindar se Takraate hain

mere jazbaat isi KHauf se mar jate hain

jo sada dur se aai hai faqat wahm se wo

wahm ke sae se ummid lagana hai fuzul

dahr ki talKH haqiqat ko nazar mein rakh kar

ret par KHwabon ki taswir banana hai fuzul

aisi taswir ka har rang utar jata hai

waqt ke sath KHalaon mein bikhar jata hai