rahm-dil laDki

kisī shahr meñ ek beva kā ghar thā

na jis meñ kahīñ raushnī kā guzar thā

baḌī thī ġharīb aur muflis bichārī

zamāne kī dukhiyā thī qismat kī maarī

na apnā na begāna ġham-ḳhvār koī

faqat ek beTī hī beTī thī us kī

mohalle se ik raat khānā jo aayā

kiyā shukr beva ne ḳhush ho ke khāyā

magar rakh liyā us ne laḌkī kā hissa

tabī.at ḳharāb us kī thī kuchh ziyāda

Thahar kar maiñ khā.ūñgī khānā vo bolī

hifāzat se rakhiye ise pyārī ammī

usī vaqt dar par faqīr ek aayā

sadā dī ki mil jaa.e kuchh rāh-e-maulā

uThī chārpā.ī se laḌkī ye sun kar

zarā khol darvāza jhāñkā jo bāhar

uThī chārpā.ī se laḌkī ye sun kar

zarā khol darvāza jhāñkā jo bāhar

to kyā dekhtī hai faqīr ek būḌhā

phaTī jis kī gudḌī piyāla hai TuuTā

ajab ronī sūrat banā ke khaḌā hai

kamar jhuk rahī hai laboñ par duā hai

palaT aa.ī laḌkī uThā laa.ī khānā

diyā apnā hissa bhikārī ko saarā

bhikārī gayā yuuñ duā us ko detā

bhalā jo karegā bhalā hogā us kā

huī sub.h ik ardalī dar pe aayā

bulāve kā hākim se parvāna laayā

Dareñ pahle donoñ magar ardalī ne

bañdhā.ī jo Dhāras gayā ḳhauf dil se

ga.iiñ jab milā un ko in.aam itnā

kabhī vahm bhī dil meñ aayā na hogā

khulī baa'd meñ jab haqīqat ye saarī

ki ḳhud hākim-e-shahr thā vo bhikārī

jo phirtā hai shab ko yūñhī bhes badle

re.āyā ke har shaḳhs kā haal dekhe

to karne lagīñ faḳhr qismat pe apnī

ki roTī ke badle meñ daulat ye paa.ī

ġharaz jo savālī kī puurī karegā

ḳhudā us kā muñh motiyoñ se bharegā

kisi shahr mein ek bewa ka ghar tha

na jis mein kahin raushni ka guzar tha

baDi thi gharib aur muflis bichaari

zamane ki dukhiya thi qismat ki mari

na apna na begana gham-KHwar koi

faqat ek beTi hi beTi thi us ki

mohalle se ek raat khana jo aaya

kiya shukr bewa ne KHush ho ke khaya

magar rakh liya us ne laDki ka hissa

tabiat KHarab us ki thi kuchh ziyaada

Thahar kar main khaungi khana wo boli

hifazat se rakhiye ise pyari ammi

usi waqt dar par faqir ek aaya

sada di ki mil jae kuchh rah-e-maula

uThi chaarpai se laDki ye sun kar

zara khol darwaza jhanka jo bahar

uThi chaarpai se laDki ye sun kar

zara khol darwaza jhanka jo bahar

to kya dekhti hai faqir ek buDha

phaTi jis ki gudDi piyala hai TuTa

ajab roni surat bana ke khaDa hai

kamar jhuk rahi hai labon par dua hai

palaT aai laDki uTha lai khana

diya apna hissa bhikari ko sara

bhikari gaya yun dua us ko deta

bhala jo karega bhala hoga us ka

hui subh ek ardali dar pe aaya

bulawe ka hakim se parwana laya

Daren pahle donon magar ardali ne

bandhai jo Dhaaras gaya KHauf dil se

gain jab mila un ko inam itna

kabhi wahm bhi dil mein aaya na hoga

khuli ba'd mein jab haqiqat ye sari

ki KHud hakim-e-shahr tha wo bhikari

jo phirta hai shab ko yunhi bhes badle

reaya ke har shaKHs ka haal dekhe

to karne lagin faKHr qismat pe apni

ki roTi ke badle mein daulat ye pai

gharaz jo sawali ki puri karega

KHuda us ka munh motiyon se bharega