rahne do

jo lamhe biit ga.e jānāñ kyūñkar vo lauT ke ā.eñge

vo dil jo TuuT ga.e hamdam āḳhir kaise juḌ pā.eñge

ab saarī koshish rahne do

aur muḳhtārī ke sahrā meñ ik hijr kī bandish rahne do

jo naqsh havā ke haath lage DhūñDo to kahāñ tak jāoge

jaao bhī agar kyā pāoge bas ek tumhī thak jāoge

hāthoñ kī lakīroñ kī mere ḳhvāboñ se sāzish rahne do

ab saarī koshish rahne do

vo pahlī koñpal se alhaḌ vo taaza barfoñ se jazbe

vo har anjām se be-parvā ma.asūm ġhazāloñ se jazbe

ab in jazboñ kī raakh tale is dil kī sozish rahne do

ab saarī koshish rahne do

ham tār-e-kafan se jazboñ ke kuchh na.e irāde bun leñge

kuchh aur ta.alluq bāñdh ke ham kuchh bāteñ kah leñ sun leñge

marne tak zinda rahne kī koī gunjā.ish rahne do

ab saarī koshish rahne do

jo lamhe bit gae jaanan kyunkar wo lauT ke aaenge

wo dil jo TuT gae hamdam aaKHir kaise juD paenge

ab sari koshish rahne do

aur muKHtari ke sahra mein ek hijr ki bandish rahne do

jo naqsh hawa ke hath lage DhunDo to kahan tak jaoge

jao bhi agar kya paoge bas ek tumhi thak jaoge

hathon ki lakiron ki mere KHwabon se sazish rahne do

ab sari koshish rahne do

wo pahli konpal se alhaD wo taza barfon se jazbe

wo har anjam se be-parwa masum ghazalon se jazbe

ab in jazbon ki rakh tale is dil ki sozish rahne do

ab sari koshish rahne do

hum tar-e-kafan se jazbon ke kuchh nae irade bun lenge

kuchh aur talluq bandh ke hum kuchh baaten kah len sun lenge

marne tak zinda rahne ki koi gunjaish rahne do

ab sari koshish rahne do