rajaz

uThāo mash.al

chalo vo bastī qarīb-tar hai

jahāñ baserā hai be-gharoñ kā

ye log vahshat-zada

ki jin ke udaas chehroñ pe

be-yaqīnī kī dāstāñ hai

aur in kī āñkhoñ ke rāste meñ

is ahd kī karbalā kā manzar sajā huā hai

ye log mahsūr ho ga.e haiñ

javān kitne hī in ke ham ne

qatīl-e-teġh-e-jafā kiye haiñ

ab in ke bachche

yā in ke bhaa.ī

ye hurriyat ke na.e sipāhī

nahīf hāthoñ meñ le ke patthar

samajh rahe haiñ

ki fat.h in ke nasīb meñ hai

ye kitne majbūr ho ga.e haiñ

to ai sipāh-e-amīr-e-zulmat

baḌhāo lashkar

nihatte bachchoñ aur auratoñ ko

bahādurī ke dikhāo jauhar

dikhāo jauhar

uThāo mash.al

zamīñ to ham ne kal in ke qadmoñ se khīñch lī thī

chalo ki sar se falak bhī khīñcheñ

uThao mashal

chalo wo basti qarib-tar hai

jahan basera hai be-gharon ka

ye log wahshat-zada

ki jin ke udas chehron pe

be-yaqini ki dastan hai

aur in ki aankhon ke raste mein

is ahd ki karbala ka manzar saja hua hai

ye log mahsur ho gae hain

jawan kitne hi in ke hum ne

qatil-e-tegh-e-jafa kiye hain

ab in ke bachche

ya in ke bhai

ye hurriyat ke nae sipahi

nahif hathon mein le ke patthar

samajh rahe hain

ki fath in ke nasib mein hai

ye kitne majbur ho gae hain

to ai sipah-e-amir-e-zulmat

baDhao lashkar

nihatte bachchon aur auraton ko

bahaduri ke dikhao jauhar

dikhao jauhar

uThao mashal

zamin to hum ne kal in ke qadmon se khinch li thi

chalo ki sar se falak bhi khinchen