raKHsh-e-umr

baiThā thā ek roz maiñ āñgan kī dhuup meñ

aalam tamām halqa-e-dām-e-ḳhayāl thā

sargoshiyoñ meñ vaqt sunātā thā baar baar

qisse qadīm qaisar-o-kisrā kī shaan ke

kartā thā varq varq har ik dāstān ke

maiñ ne kahā ki ham-dam-o-ham-rāz-o-dīda-var

mā-qissā-e-sikandar-o-dārā na ḳhvānda-aim

kuchh zikr ho sabā kā guloñ kā shabāb kā

sāġhar kā mai-kade kā surāhī kā naab kā

kuchh baat ho bahār kī bārāñ kī dhuup kī

ḳhushbū kī chāñdnī kī fazāoñ kī ruup kī

ho jaa.e kuchh mushāhida-e-haq kī guftugū

kuchh bhūlne kī phir use paane kī justujū

kuchh pūchh mujh se bābat-e-afkār-e-dojahāñ

ahvāl-o-iḳhteyār-o-shikāyāt-e-dostāñ

jo jī meñ aa.e pūchh

magar itnā yaad rakh

''az mā ba-juz hikāyat-e-mehr-o-vafā mapurs''

bolā ki tū ''rahīn-e-sitam-hā-e-rozgār''

kyā jāntā hai bābat-e-imkān-e-zindagī

jiitā hai zindagī se pashemān-e-zindagī

kuchh apne dil kā haal bhī ma.alūm hai tujhe

ye vahshateñ ye dard ye tanhā.iyoñ kā bojh

ye hijrateñ ye karb ye bezāriyoñ kā rog

ye hasrateñ ye ranj ye afsurdagī ye sog

siina hai daaġh daaġh jigar laḳht laḳht hai

tū ḳhud kahāñ hai aur kahāñ terā baḳht hai

qulzum ko ek qatre kī ḳhātir bahā diyā

jo vaqt ne diyā tujhe sab kuchh gañvā diyā

ek baar muḌ ke dekh ki kyā terā kho gayā

jaagā tirā nasīb to tū ḳhud hī so gayā

ab hijr na visāl na saudā na suud hai

lamhe se bhī qalīl ye terā vajūd hai

baaqī bachā hai aur kyā tere hisāb meñ

“nai haath baag par hai na pā hai rikāb meñ''

baiTha tha ek roz main aangan ki dhup mein

aalam tamam halqa-e-dam-e-KHayal tha

sargoshiyon mein waqt sunata tha bar bar

qisse qadim qaisar-o-kisra ki shan ke

karta tha warq warq har ek dastan ke

main ne kaha ki ham-dam-o-ham-raaz-o-dida-war

ma-qissa-e-sikandar-o-dara na KHwanda-aim

kuchh zikr ho saba ka gulon ka shabab ka

saghar ka mai-kade ka surahi ka nab ka

kuchh baat ho bahaar ki baran ki dhup ki

KHushbu ki chandni ki fazaon ki rup ki

ho jae kuchh mushahida-e-haq ki guftugu

kuchh bhulne ki phir use pane ki justuju

kuchh puchh mujh se babat-e-afkar-e-dojahan

ahwal-o-iKHteyar-o-shikayat-e-dostan

jo ji mein aae puchh

magar itna yaad rakh

az ma ba-juz hikayat-e-mehr-o-wafa mapurs

bola ki tu rahin-e-sitam-ha-e-rozgar

kya jaanta hai babat-e-imkan-e-zindagi

jita hai zindagi se pasheman-e-zindagi

kuchh apne dil ka haal bhi malum hai tujhe

ye wahshaten ye dard ye tanhaiyon ka bojh

ye hijraten ye karb ye bezariyon ka rog

ye hasraten ye ranj ye afsurdagi ye sog

sina hai dagh dagh jigar laKHt laKHt hai

tu KHud kahan hai aur kahan tera baKHt hai

qulzum ko ek qatre ki KHatir baha diya

jo waqt ne diya tujhe sab kuchh ganwa diya

ek bar muD ke dekh ki kya tera kho gaya

jaga tera nasib to tu KHud hi so gaya

ab hijr na visal na sauda na sud hai

lamhe se bhi qalil ye tera wajud hai

baqi bacha hai aur kya tere hisab mein

“nai hath bag par hai na pa hai rikab mein