rang-chor

lo shaam ho rahī hai

aur us ne hamāre chehre chorī karne shurūa kar diye haiñ

tum chhoTe chor ho

maiñ chhoTā chor nahīñ

samundar meñ utrā

to samundar ne mere kapḌoñ kā koī rang na churāyā

haañ thoḌe se mere saañs zarūr

us ne chorī kar liye the

ma.alūm hotā hai ye bhī chor hai

tum ne kabhī miTTī meñ ġhota lagāyā hai

miTTī chorī karnā baḌā mushkil kaam hai

agar maiñ ne miTTī meñ ġhota lagāyā

to vo mere saare saañs chorī kar legā

to phir ye banda chor chor nahīñ rahegā

rāste meñ to ka.ī rāheñ rañgī huī haiñ

aur an-dekhe ne ba.az jagah

ek hī rang rañgā huā hai

tum ġhāroñ ke rang chorī kar sakte ho

sach pūchho to sab se baḌā rang-chor sūraj hai

rang tak pahuñchte pahuñchte ye tumheñ ka.ī rang dikhā jā.egā

dekhnā ā.īne meñ hamārī āñkheñ ek sī to nahīñ lag rahīñ

kabhī havā ko bhī shīsha kahte haiñ

dekh havā tere kapḌe bhī pakaḌ rahī hai aur mere bhī

kahīñ ye bhī to chor nahīñ

tum chorī karne nikle ho ki rang hone

dekho samundar jab patthar kī satah par aatā hai

to safed ho jaatā hai

aur havā jab peḌoñ pe chaḌh

nāchtī hai to harī ho jaatī hai

aadmī jab rotā hai

apne āñsūoñ meñ Duub jaatā hai

us vaqt tum aadmī kā koī rang chorī nahīñ kar sakte

batāo

āsmān kā rang zamīn pe kaise utrā

tumheñ itnī bārīkiyāñ batā duuñ

to ḳhud chorī ho jā.ūñ

chorī karo pahle is patthar kā rang bhī

is ko jitnā toḌtā huuñ

ek hī rang kī āvāz dete haiñ ye patthar

aur rang chūra-chūra ho jaate haiñ

paanī bhī apnā rang nahīñ nikāl rahā

kahīñ ye bhī rotā huā aadmī to nahīñ

TuuTe phuul kī guftugū bhī ḳhanjar ho ga.ī hai

jo phuul shaam meñ toḌe the

unheñ raat ke añdheroñ ne kaalā kar diyā hai

āhista āhista chalo

hamārī aahaT pā kar koī rang chhup na jaa.e

ye aag bujh nahīñ saktī

aag bujh ga.ī to tum chor nahīñ rahoge

añdhere raushaniyāñ chorī karte haiñ

ye ḳhud chor hote haiñ

maiñ ne chorī na kī to merā ghar be-angāra rah jā.egā

merī roTī kā rang safed paḌ jā.egā

merī bhuuk rang rang pukāregī

mujhe TuuTe phūloñ ke paas le jā.egī

aur phuul jānte haiñ ki maiñ chor huuñ

jab āñkhoñ kī keñchulī chorī ho jaatī hai

insān aise hī rang choriyāñ karne nikal khaḌā hotā hai

maiñ ne samundar kā rang churāyā thā to farsh banāyā thā

āñkhoñ ke rang churā.e the to dīvāreñ banā.īñ thiiñ

sūraj kā rang churāyā thā to chhāñv banā.ī thī

bhuuk kā rang churāyā thā to chūlhā banāyā thā

chuġhlī kā rang churāyā thā to kapḌe silvā.e the

aur jab aag kā rang chorī kiyā

to merī roTī kachchī rah ga.ī

patthar ḳhāmosh ho jaate haiñ

aur diye kī lau

ḳhalā ko phir se jalānā shurūa kar detī hai

lo sham ho rahi hai

aur us ne hamare chehre chori karne shurua kar diye hain

tum chhoTe chor ho

main chhoTa chor nahin

samundar mein utra

to samundar ne mere kapDon ka koi rang na churaya

han thoDe se mere sans zarur

us ne chori kar liye the

malum hota hai ye bhi chor hai

tum ne kabhi miTTi mein ghota lagaya hai

miTTi chori karna baDa mushkil kaam hai

agar main ne miTTi mein ghota lagaya

to wo mere sare sans chori kar lega

to phir ye banda chor chor nahin rahega

raste mein to kai rahen rangi hui hain

aur an-dekhe ne baz jagah

ek hi rang ranga hua hai

tum ghaaron ke rang chori kar sakte ho

sach puchho to sab se baDa rang-chor suraj hai

rang tak pahunchte pahunchte ye tumhein kai rang dikha jaega

dekhna aaine mein hamari aankhen ek si to nahin lag rahin

kabhi hawa ko bhi shisha kahte hain

dekh hawa tere kapDe bhi pakaD rahi hai aur mere bhi

kahin ye bhi to chor nahin

tum chori karne nikle ho ki rang hone

dekho samundar jab patthar ki satah par aata hai

to safed ho jata hai

aur hawa jab peDon pe chaDh

nachti hai to hari ho jati hai

aadmi jab rota hai

apne aansuon mein Dub jata hai

us waqt tum aadmi ka koi rang chori nahin kar sakte

batao

aasman ka rang zamin pe kaise utra

tumhein itni barikiyan bata dun

to KHud chori ho jaun

chori karo pahle is patthar ka rang bhi

is ko jitna toDta hun

ek hi rang ki aawaz dete hain ye patthar

aur rang chura-chura ho jate hain

pani bhi apna rang nahin nikal raha

kahin ye bhi rota hua aadmi to nahin

TuTe phul ki guftugu bhi KHanjar ho gai hai

jo phul sham mein toDe the

unhen raat ke andheron ne kala kar diya hai

aahista aahista chalo

hamari aahaT pa kar koi rang chhup na jae

ye aag bujh nahin sakti

aag bujh gai to tum chor nahin rahoge

andhere raushaniyan chori karte hain

ye KHud chor hote hain

main ne chori na ki to mera ghar be-angara rah jaega

meri roTi ka rang safed paD jaega

meri bhuk rang rang pukaregi

mujhe TuTe phulon ke pas le jaegi

aur phul jaante hain ki main chor hun

jab aankhon ki kenchuli chori ho jati hai

insan aise hi rang choriyan karne nikal khaDa hota hai

main ne samundar ka rang churaya tha to farsh banaya tha

aankhon ke rang churae the to diwaren banain thin

suraj ka rang churaya tha to chhanw banai thi

bhuk ka rang churaya tha to chulha banaya tha

chughli ka rang churaya tha to kapDe silwae the

aur jab aag ka rang chori kiya

to meri roTi kachchi rah gai

patthar KHamosh ho jate hain

aur diye ki lau

KHala ko phir se jalana shurua kar deti hai