rang-e-siyah ke nam ek nazm

kisī nigro ke tanomand paikar kī mānind

ye sāhilī ābnūsī chaTTāneñ

ki jin ke kaTāv

samundar kī saffāk maujoñ ke baḳhshe hue

ghaav meñ

vo samundar jo hai nīlgūñ

niilī āñkhoñ kī mānind

aur jis kī lahroñ ke hāthoñ meñ

ḳhanjar ke phal kī tarah jagmagātā huā nuqra.ī jhaag hai

mauj-dar-mauj yalġhār hai ḳhanjaroñ kī

chaTTānoñ ke siine hadaf haiñ

ye chaTTāneñ

jo pā-basta be-zindagī aur tanhā khaḌī haiñ

samundar ke is nīlgūñ ā.īne se bahut duur

uupar khule āsmān pur

fazā meñ bhaTakte hue abr-pāroñ ko

sākit jahāzoñ ke arshoñ pa mañDlāne vaale

safed aur āzād ābī-parindoñ ko

sadiyoñ se dekhe chalī jā rahī haiñ

magar kyā ye mumkin nahīñ

in chaTTānoñ ko is qaid se aur tanhā.ī se

ho ke āzād

un tā.eroñ bādaloñ titliyoñ kī tarah

sabza-zāroñ khule pāniyoñ aur raushan fazāoñ meñ

lahrāte phirne kī hasrat bhī ho

hai agar yuuñ to phir

un siyah-fām be-bas chaTānoñ ko

izn-e-rihā.ī bhalā kaun de

kisi nigro ke tanomand paikar ki manind

ye sahili aabnusi chaTTanen

ki jin ke kaTaw

samundar ki saffak maujon ke baKHshe hue

ghaw mein

wo samundar jo hai nilgun

nili aankhon ki manind

aur jis ki lahron ke hathon mein

KHanjar ke phal ki tarah jagmagata hua nuqrai jhag hai

mauj-dar-mauj yalghaar hai KHanjaron ki

chaTTanon ke sine hadaf hain

ye chaTTanen

jo pa-basta be-zindagi aur tanha khaDi hain

samundar ke is nilgun aaine se bahut dur

upar khule aasman pur

faza mein bhaTakte hue abr-paron ko

sakit jahazon ke arshon pa manDlane wale

safed aur aazad aabi-parindon ko

sadiyon se dekhe chali ja rahi hain

magar kya ye mumkin nahin

in chaTTanon ko is qaid se aur tanhai se

ho ke aazad

un taeron baadalon titliyon ki tarah

sabza-zaron khule paniyon aur raushan fazaon mein

lahraate phirne ki hasrat bhi ho

hai agar yun to phir

un siyah-fam be-bas chaTanon ko

izn-e-rihai bhala kaun de