رنگ و نور کی رات

یہ رنگ و نور کی برسات

جگنوؤں کی برات

بکھر رہی ہے فضاؤں میں کہکشاں کی طرح

اجالے کتنی ہی راتوں کا زہر پی پی کر

بصد خلوص بہ انداز دل کشی اب بھی

سیاہ راتوں میں تاریکیوں کے چہروں پر

ابھر رہے ہیں مگر

یہاں ہے کتنی نگاہوں میں روشنی کا چلن

دلوں میں کتنے ضیا لے رہی ہے انگڑائی

نظر نظر میں دھندلکا

دھواں دھواں آنکھیں

بساط دل پہ اداسی کا رقص جاری ہے

اداس ہیں در و دیوار

بجھے بجھے سے گھر

ہیں کتنے ایسے مکاں جن میں دیپ جلتے ہیں

یہ رات وہ ہے کہ تاریکیوں کے دامن میں

کہیں پہ دوستو خوشیوں کے جل رہے ہیں چراغ

کہیں پہ زخم سلگتے ہیں دل پگھلتے ہیں