rang-o-nur ki raat

ye rang-o-nūr kī barsāt

jugnūoñ kī barāt

bikhar rahī hai fazāoñ meñ kahkashāñ kī tarah

ujāle kitnī hī rātoñ kā zahr pī pī kar

ba-sad-ḳhulūs ba-andāz-e-dil-kashī ab bhī

siyāh rātoñ meñ tārīkiyoñ ke chehroñ par

ubhar rahe haiñ magar

yahāñ hai kitnī nigāhoñ meñ raushnī kā chalan

diloñ meñ kitne ziyā le rahī hai añgḌā.ī

nazar nazar meñ dhuñdalkā

dhuāñ dhuāñ āñkheñ

bisāt-e-dil pe udāsī kā raqs jaarī hai

udaas haiñ dar-o-dīvār

bujhe bujhe se ghar

haiñ kitne aise makāñ jin meñ diip jalte haiñ

ye raat vo hai ki tārīkiyoñ ke dāman meñ

kahīñ pe dosto ḳhushiyoñ ke jal rahe haiñ charāġh

kahīñ pe zaḳhm sulagte haiñ dil pighalte haiñ

ye rang-o-nur ki barsat

jugnuon ki baraat

bikhar rahi hai fazaon mein kahkashan ki tarah

ujale kitni hi raaton ka zahr pi pi kar

ba-sad-KHulus ba-andaz-e-dil-kashi ab bhi

siyah raaton mein tarikiyon ke chehron par

ubhar rahe hain magar

yahan hai kitni nigahon mein raushni ka chalan

dilon mein kitne ziya le rahi hai angDai

nazar nazar mein dhundalka

dhuan dhuan aankhen

bisat-e-dil pe udasi ka raqs jari hai

udas hain dar-o-diwar

bujhe bujhe se ghar

hain kitne aise makan jin mein dip jalte hain

ye raat wo hai ki tarikiyon ke daman mein

kahin pe dosto KHushiyon ke jal rahe hain charagh

kahin pe zaKHm sulagte hain dil pighalte hain