raqqasa-e-geti

dā.eroñ meñ ghirī raqs kartī rahī

apne mehvar pe rah kar thiraktī rahī

dhuup meñ chāñdnī meñ har ik gaam par

kashmakash se jahāñ ke guzartī rahī

badliyāñ jhuum kar ḳhuub barsīñ magar

meñh barastā rahā maiñ jhulastī rahī

nek-o-bad kī tarāzū uThā.e hue

apne jazbāt meñ aap ghuTtī rahī

āsmānoñ se barsī huī aag se

pāra-pāra huī ki jhulastī rahī

zulm ke pāsbānoñ ke saaye tale

zaḳhm khātī rahī vaar sahtī rahī

kitne tūfāñ mujhe rauñd kar baḌh ga.e

zalzaloñ kī tabāhī bhī sahtī rahī

dā.eroñ se nikalnā to mumkin na thā

dā.eroñ meñ ghirī raqs kartī rahī

daeron mein ghiri raqs karti rahi

apne mehwar pe rah kar thirakti rahi

dhup mein chandni mein har ek gam par

kashmakash se jahan ke guzarti rahi

badliyan jhum kar KHub barsin magar

meinh barasta raha main jhulasti rahi

nek-o-bad ki taraazu uThae hue

apne jazbaat mein aap ghuTti rahi

aasmanon se barsi hui aag se

para-para hui ki jhulasti rahi

zulm ke pasbanon ke saye tale

zaKHm khati rahi war sahti rahi

kitne tufan mujhe raund kar baDh gae

zalzalon ki tabahi bhi sahti rahi

daeron se nikalna to mumkin na tha

daeron mein ghiri raqs karti rahi