raqqasa-e-hayat se

phūloñ pe raqs aur na bahāroñ pe raqs kar

gulzār-e-hast-e-būd meñ ḳhāroñ pe raqs kar

ho kar jumūd-e-gulshan-e-jannat se be-niyāz

dozaḳh ke be-panāh sharāroñ pe raqs kar

sham-e-sahar fusūn-e-tabassum, hayāt-e-gul

fitrat ke in ajiib nazāroñ pe raqs kar

tanzīm-e-kā.enāt-e-junūñ kī hañsī uḌā

ujḌe hue chaman kī bahāroñ pe raqs kar

sahmī huī sadā-e-dil-e-nā-tavāñ na sun

bahkī huī nazar ke ishāroñ par raqs kar

jo mar ke jī rahe the tujhe un se kyā ġharaz

tū apne āshiqoñ ke mazāroñ pe raqs kar

har har adā ho ruuh kī gahrā.iyoñ meñ gum

yuuñ rañg-o-bū kī rāh-guzāroñ pe raqs kar

tū apnī dhun meñ mast hai tujh ko batā.e kaun

terī zamīñ falak hai sitāroñ par raqs kar

is tarah raqs kar ki sarāpā asar ho tū

koī nazar uThā.e to pesh-e-nazar ho tū

phulon pe raqs aur na bahaaron pe raqs kar

gulzar-e-hast-e-bud mein KHaron pe raqs kar

ho kar jumud-e-gulshan-e-jannat se be-niyaz

dozaKH ke be-panah shararon pe raqs kar

sham-e-sahar fusun-e-tabassum, hayat-e-gul

fitrat ke in ajib nazaron pe raqs kar

tanzim-e-kaenat-e-junun ki hansi uDa

ujDe hue chaman ki bahaaron pe raqs kar

sahmi hui sada-e-dil-e-na-tawan na sun

bahki hui nazar ke ishaaron par raqs kar

jo mar ke ji rahe the tujhe un se kya gharaz

tu apne aashiqon ke mazaron pe raqs kar

har har ada ho ruh ki gahraiyon mein gum

yun rang-o-bu ki rah-guzaron pe raqs kar

tu apni dhun mein mast hai tujh ko batae kaun

teri zamin falak hai sitaron par raqs kar

is tarah raqs kar ki sarapa asar ho tu

koi nazar uThae to pesh-e-nazar ho tu