raqs-e-wahshat karun

maiñ umīdoñ kī ye bujhtī kirneñ liye

yuuñ añdheroñ meñ kab tak bhaTaktī phirūñ

apne zaḳhmoñ pe phailā.ūñ maiñ kab talak

be-sadā ḳhvāhishoñ kī sulagtī qabā

aur phir kab talak

tishnagī ke jo paivand haiñ jā-ba-jā

is jahāñ kī nazar se chhupātī phirūñ

kab talak maiñ sunūñ naġhma-e-zindagī

har ukhaḌtī huī saañs ke saaz par

kab talak yuuñ jamā.e rahūñ maiñ qadam

vaqt kī is ḳhatarnāk Dhalvān par

jis kī phislan liye jā rahī hai use

duur mujh se bahut duur jaane kidhar

din-ba-din us kī mādūm hotī huī

dhundlī dhundlī sī parchhā.iyāñ dekh kar

jī kahe

aatmā kā galā ghoñT duuñ

aur phir yaas ke tilmilāte hue

andhe vahshī bagūloñ kī yūrish banūñ

raqs-e-vahshat karūñ

main umidon ki ye bujhti kirnen liye

yun andheron mein kab tak bhaTakti phirun

apne zaKHmon pe phailaun main kab talak

be-sada KHwahishon ki sulagti qaba

aur phir kab talak

tishnagi ke jo paiwand hain ja-ba-ja

is jahan ki nazar se chhupati phirun

kab talak main sunun naghma-e-zindagi

har ukhaDti hui sans ke saz par

kab talak yun jamae rahun main qadam

waqt ki is KHatarnak Dhalwan par

jis ki phislan liye ja rahi hai use

dur mujh se bahut dur jaane kidhar

din-ba-din us ki madum hoti hui

dhundli dhundli si parchhaiyan dekh kar

ji kahe

aatma ka gala ghonT dun

aur phir yas ke tilmilate hue

andhe wahshi bagulon ki yurish banun

raqs-e-wahshat karun