raqs

mire ham-raqs

maiñ jab eḌiyāñ apnī uThā kar

tumhāre mazbūt kandhoñ se pare

pas-manzar meñ raqsāñ ziist ko

vafā kā giit gaate dekhtī huuñ

to mirī masrūr āñkheñ

vafūr-e-ishq se be-tāb ho kar kāñptī haiñ

mire chehre ko

palkoñ kā naġhma surḳh kartā hai

badan kā ḳhuun ruḳhsāroñ pe sho.ale pheñktā hai

mohabbat maañg meñ merī

rupahlī aur sunahrī

afshāñ chhiḌaktī hai

maiñ apnī garm sāñsoñ se

mahakte aur ujle ḳhushnumā collar tale

tumhārī gandumī

chamkīlī damaktī jild chhūtī huuñ

mire mahbūb lamhe machalte jugnuoñ jaise

mire malbūs ke lahre se mil kar

dā.eroñ meñ jhilmilāte haiñ

tum apne bāzuoñ kī

giraft-e-be-panāh ko zarā kam karo

ki maiñ

tumhārī dhaḌkanoñ kī taal par paañv uThā.ūñ

mujhe Dar hai mirā dil rāsta na bhuul jaa.e

mutriba

saaz bajā

mere ham-raqs

main jab eDiyan apni uTha kar

tumhaare mazbut kandhon se pare

pas-manzar mein raqsan zist ko

wafa ka git gate dekhti hun

to meri masrur aankhen

wafur-e-ishq se be-tab ho kar kanpti hain

mere chehre ko

palkon ka naghma surKH karta hai

badan ka KHun ruKHsaron pe shoale phenkta hai

mohabbat mang mein meri

rupahli aur sunahri

afshan chhiDakti hai

main apni garm sanson se

mahakte aur ujle KHushnuma collar tale

tumhaari gandumi

chamkili damakti jild chhuti hun

mere mahbub lamhe machalte jugnuon jaise

mere malbus ke lahre se mil kar

daeron mein jhilmilate hain

tum apne bazuon ki

giraft-e-be-panah ko zara kam karo

ki main

tumhaari dhaDkanon ki tal par panw uThaun

mujhe Dar hai mera dil rasta na bhul jae

mutriba

saz baja