raqs

sukūt khulne lagā hai

tanhā.ī chahchahātī hai bām-o-dar par

maiñ apne ābā.ī ghar kī pichhlī shikasta sīḌhī pe sar jhukā.e

guzishta sadiyoñ ko gin rahī huuñ

safed aur surḳh pattharoñ kā makān ab

mom ban ke mujh par Tapak rahā hai pighal rahā hai

sabhī diye bujh chuke haiñ yaañ tāq-e-ārzū ke

kitāb-e-rafta ke kuchh varaq bas khule hue haiñ

ki jin kā mujh ko amiiñ banāyā safīr-e-shab ne

kuchh is tarah gardish-e-mah-o-sāl kī namī se

ye gal rahe haiñ

ki in meñ ik harf bhī salāmat nahīñ milegā

tamām ādarsh jal rahe haiñ

aur in ke sho.aloñ kī raushnī meñ

ajiib manzar ubhar rahā hai

ye sard dālān

is se aage ġhulām-gardish

ye laq-o-daq sahn DevḌhiyāñ aur baḌā ahāta

mire jilau meñ

ye kaisī parchhā.iyāñ sī har samt raqs kartī guzar rahī haiñ

ye mere aabā ke zar-ḳharīd aur ġhulām haiñ sab

hazāroñ rūheñ ba-yak zabāñ chīḳhtī hoñ jaise

ġhulām gardish meñ

ghuñgrūoñ kī ye kaisī chham-chham baras rahī hai

ye kaun sāzoñ pe haath rakkhe

lahū ke aañsū hasīn poroñ se ro rahā hai

ki jin kī āvāz Das rahī hai

aur us ke pīchhe

vo duur ḳhalvat meñ ruuh kis kī taras rahī hai

yahī vo aurat hai

jis kī āñkhoñ ko chūmne kī sitāre hasrat kareñ to ro.eñ

ye shab ke parde meñ

apne ḳhalvat-kade meñ kis ko bulā rahī hai

ye kis ko aañsū dikhā rahī hai

baḌe ahāte ke is kuñ.eñ meñ

ye nāznīnoñ kī kaisī chīḳheñ haiñ

jo muqayyad haiñ tiin nasloñ se

aur rūheñ phaḌak rahī haiñ

ye kaun DevḌhī meñ khāñstā hai

ye kaun bhūkā nahīf bachcha anaaj kī koThiyoñ ke aage

abhī abhī ro ke so gayā hai

ye sar ko niyoḌhā.e kaun laḌkī

udhar añdhere meñ ro rahī hai

ye ek goshe meñ kaun būḌhā

lahū meñ tar āstīñ chhupā.e

tamām rūhoñ se muñh churā.e

kamāñ kī sūrat jhukā huā hai

laraz rahā hai

ki mere aabā kī sabz miTTī kā shāḳhsāna

pas-e-darīcha khulā huā hai

ajab tamāshā lagā huā hai

yahī makāñ haiñ

haveliyāñ haiñ

atā-o-jūd-o-saḳhā ke markaz

tashaddud-o-jabr ke idāre

ab in meñ raqsāñ haiñ zar-ḳharīd aur ġhulām saare

sukut khulne laga hai

tanhai chahchahati hai baam-o-dar par

main apne aabai ghar ki pichhli shikasta siDhi pe sar jhukae

guzishta sadiyon ko gin rahi hun

safed aur surKH pattharon ka makan ab

mom ban ke mujh par Tapak raha hai pighal raha hai

sabhi diye bujh chuke hain yan taq-e-arzu ke

kitab-e-rafta ke kuchh waraq bas khule hue hain

ki jin ka mujh ko amin banaya safir-e-shab ne

kuchh is tarah gardish-e-mah-o-sal ki nami se

ye gal rahe hain

ki in mein ek harf bhi salamat nahin milega

tamam aadarsh jal rahe hain

aur in ke shoalon ki raushni mein

ajib manzar ubhar raha hai

ye sard dalan

is se aage ghulam-gardish

ye laq-o-daq sahn DewDhiyan aur baDa ahata

mere jilau mein

ye kaisi parchhaiyan si har samt raqs karti guzar rahi hain

ye mere aaba ke zar-KHarid aur ghulam hain sab

hazaron ruhen ba-yak zaban chiKHti hon jaise

ghulam gardish mein

ghungruon ki ye kaisi chham-chham baras rahi hai

ye kaun sazon pe hath rakkhe

lahu ke aansu hasin poron se ro raha hai

ki jin ki aawaz Das rahi hai

aur us ke pichhe

wo dur KHalwat mein ruh kis ki taras rahi hai

yahi wo aurat hai

jis ki aankhon ko chumne ki sitare hasrat karen to roen

ye shab ke parde mein

apne KHalwat-kade mein kis ko bula rahi hai

ye kis ko aansu dikha rahi hai

baDe ahate ke is kunen mein

ye nazninon ki kaisi chiKHen hain

jo muqayyad hain tin naslon se

aur ruhen phaDak rahi hain

ye kaun DewDhi mein khansta hai

ye kaun bhuka nahif bachcha anaj ki koThiyon ke aage

abhi abhi ro ke so gaya hai

ye sar ko niyoDhae kaun laDki

udhar andhere mein ro rahi hai

ye ek goshe mein kaun buDha

lahu mein tar aastin chhupae

tamam ruhon se munh churae

kaman ki surat jhuka hua hai

laraz raha hai

ki mere aaba ki sabz miTTi ka shaKHsana

pas-e-daricha khula hua hai

ajab tamasha laga hua hai

yahi makan hain

haweliyan hain

ata-o-jud-o-saKHa ke markaz

tashaddud-o-jabr ke idare

ab in mein raqsan hain zar-KHarid aur ghulam sare