ras-bhare honT

ras-bhare hoñT

phuul se halke

jaise billor kī surāhī meñ

bāda-e-ātishīñ-nafs chhalke

jaise nargis kī gol āñkhoñ se

ek shabnam kā arġhavāñ qatra

shafaq-e-sub.h se daraḳhshanda

dhīre dhīre sambhal sambhal Dhalke

ras-bhare hoñT yuuñ larazte haiñ.....!

yuuñ larazte haiñ jis tarah koī

raat din kā thakā huā raahī

paañv chhalnī nigāh mutazalzal

vaqt sahra-e-be-karāñ ki jahāñ

sañg-e-manzil-numā na aaj na kal.....

daf.atan duur.....! duur..... aañkh se duur

shafaq-e-shām kī siyāhī meñ

qalb kī ārzū-nigāhī meñ

farsh se arsh tak jhalak uTThe

ek dhokā..... sarāb..... mañb-e-nūr.....!

ras-bhare hoñT dekh kar 'tāsīr'

raat din ke thake hue raahī

yuuñ taraste haiñ, yuuñ larazte haiñ.....!

ras-bhare honT

phul se halke

jaise billor ki surahi mein

baada-e-atishin-nafs chhalke

jaise nargis ki gol aankhon se

ek shabnam ka arghawan qatra

shafaq-e-subh se daraKHshanda

dhire dhire sambhal sambhal Dhalke

ras-bhare honT yun larazte hain!

yun larazte hain jis tarah koi

raat din ka thaka hua rahi

panw chhalni nigah mutazalzal

waqt sahra-e-be-karan ki jahan

sang-e-manzil-numa na aaj na kal

dafatan dur! dur aankh se dur

shafaq-e-sham ki siyahi mein

qalb ki aarzu-nigahi mein

farsh se arsh tak jhalak uTThe

ek dhoka sarab manb-e-nur!

ras-bhare honT dekh kar 'tasir'

raat din ke thake hue rahi

yun taraste hain, yun larazte hain!