rasm-e-ijra

kisī din mere baare meñ

kisī aḳhbār meñ

yā phir risāle meñ

zarā sā zikr hotā hai

to apne aap par kuchh faḳhr hotā hai

dikhātā phirtā huuñ sab ko maiñ aḳhbāroñ risāloñ meñ chhapī ḳhabreñ

bahut maġhrūr rahtā huuñ maiñ kuchh din

tumhāre naam par to

puurā majmū’a hī likh Daalā hai maiñ ne

bahut charche haiñ jis ke

log paḌhte haiñ

tumhāre naam par likkhī huī nazmeñ

tumhāre vāste likkhī huī ġhazleñ

mirī jaañ sach batāo

kaisā lagtā hai

mirī nazmoñ ke chehroñ meñ

tumhārī shakl dikhtī hai

mire alfāz meñ

jab bhī tum apnā naam paḌhtī ho

ḳhud apne par tumheñ bhī naaz to hotā hī hogā

mirī nazmoñ ke ā.īne meñ ḳhud ko dekh kar apne pe itrātī to hoñgī

magar merī ye mushkil hai

ki jab bhī log mujh se pūchhte haiñ

kaun hai kis ke liye

ye itnī pyārī nazmeñ

itnī dil-nashīñ ġhazleñ likhī haiñ

maiñ sab sach bol denā chāhtā huuñ

tumhāre naam kā e'lān karnā chāhtā huuñ

phir bhī

apne hoñT sī letā huuñ

yā nazreñ phirā kar Taal detā huuñ

mirī mushkil kā tum hī hal nikālo

tumhīñ taslīm kar lo

haañ mire hī naam par dīvāne ne dīvān likkhā hai

muqaddas lab se gar

tasdīq kar do tum

mire majmū’e kī

is se ziyāda ḳhūb-sūrat aur mukammal

rasm-e-ijrā aur koī ho nahīñ saktī

kisi din mere bare mein

kisi aKHbar mein

ya phir risale mein

zara sa zikr hota hai

to apne aap par kuchh faKHr hota hai

dikhata phirta hun sab ko main aKHbaron risalon mein chhapi KHabren

bahut maghrur rahta hun main kuchh din

tumhaare nam par to

pura majmu’a hi likh Dala hai main ne

bahut charche hain jis ke

log paDhte hain

tumhaare nam par likkhi hui nazmen

tumhaare waste likkhi hui ghazlen

meri jaan sach batao

kaisa lagta hai

meri nazmon ke chehron mein

tumhaari shakl dikhti hai

mere alfaz mein

jab bhi tum apna nam paDhti ho

KHud apne par tumhein bhi naz to hota hi hoga

meri nazmon ke aaine mein KHud ko dekh kar apne pe itraati to hongi

magar meri ye mushkil hai

ki jab bhi log mujh se puchhte hain

kaun hai kis ke liye

ye itni pyari nazmen

itni dil-nashin ghazlen likhi hain

main sab sach bol dena chahta hun

tumhaare nam ka e'lan karna chahta hun

phir bhi

apne honT si leta hun

ya nazren phira kar Tal deta hun

meri mushkil ka tum hi hal nikalo

tumhin taslim kar lo

han mere hi nam par diwane ne diwan likkha hai

muqaddas lab se gar

tasdiq kar do tum

mere majmu’e ki

is se ziyaada KHub-surat aur mukammal

rasm-e-ijra aur koi ho nahin sakti