rasm

tirī parchhā.īñ tere ba.ad bhī ghar bhar meñ phirtī hai

kabhī gul-dān meñ uljhe hue

phūloñ kī ḳhushbū kī

safeñ tartīb detī hai

kabhī sajde meñ sar rakkhe

girī bikhrī kitāboñ kī

jamā.at kī jabīnoñ par lagī barsoñ kī gard aur dhuul

palkoñ kī namī se Dhotī almārī meñ qaade bāñTī takbīr detī hai

darūd-e-dostī se peshtar

daa.eñ taraf ke haath kī uñglī uThā kar

ik shahādat ik gavāhī

naam kar detī hai chāhat ke

kabhī ā.īne meñ apnī purānī dāstāñ kī āyatoñ kā vird kartī hai

kabhī chaukhaT pe aa ke yaad kī tasbīh kartī hai

piro letī hai dānoñ meñ

ki har daane pe terā naam paḌhtī hai

magar gintī nahīñ kartī

ki har taiñtīs dānoñ ba.ad ik chhallā nahīñ aatā

kabhī in panj-vaqta khiḌkiyoñ se dhuup ke mīnār par chaḌh kar

ye hai-ala-ssalāt-e-dil kī gūñjeñ chaak kartī hai

fazā namnāk kartī hai

nigāhoñ ke ghaḌe se paanī chhalkā kar vuzū

yā phir nigāheñ ḳhushk ho jaa.eñ

to biite vaqt ke ik lams se tadbīr kī sūrat

tayammum se mirī likkhī huī nazmeñ tilāvat karne lagtī hai

sub.h se shaam hone tak

kisī tasvīr ko ka.aba banātī hai

tavāf kartī jaatī hai

na jaane kaun se kitne manāsik yaad ne

parchhā.īñ ke sar bāñdh rakkhe haiñ

ye saare kashT kartī hai

par āḳhir meñ

vahī ik āḳhirī sunnat nibhātī hai

ye apne aap ko har shaam

āñgan meñ girā kar

haar ko taslīm kar ke

rasm ke ik khurdure ḳhanjar se

bin takbīr hī

qurbān hotī hai

teri parchhain tere baad bhi ghar bhar mein phirti hai

kabhi gul-dan mein uljhe hue

phulon ki KHushbu ki

safen tartib deti hai

kabhi sajde mein sar rakkhe

giri bikhri kitabon ki

jamaat ki jabinon par lagi barson ki gard aur dhul

palkon ki nami se Dhoti almari mein qade banTi takbir deti hai

darud-e-dosti se peshtar

daen taraf ke hath ki ungli uTha kar

ek shahadat ek gawahi

nam kar deti hai chahat ke

kabhi aaine mein apni purani dastan ki aayaton ka wird karti hai

kabhi chaukhaT pe aa ke yaad ki tasbih karti hai

piro leti hai danon mein

ki har dane pe tera nam paDhti hai

magar ginti nahin karti

ki har taintis danon baad ek chhalla nahin aata

kabhi in panj-waqta khiDkiyon se dhup ke minar par chaDh kar

ye hai-ala-ssalat-e-dil ki gunjen chaak karti hai

faza namnak karti hai

nigahon ke ghaDe se pani chhalka kar wuzu

ya phir nigahen KHushk ho jaen

to bite waqt ke ek lams se tadbir ki surat

tayammum se meri likkhi hui nazmen tilawat karne lagti hai

subh se sham hone tak

kisi taswir ko kaba banati hai

tawaf karti jati hai

na jaane kaun se kitne manasik yaad ne

parchhain ke sar bandh rakkhe hain

ye sare kashT karti hai

par aaKHir mein

wahi ek aaKHiri sunnat nibhati hai

ye apne aap ko har sham

aangan mein gira kar

haar ko taslim kar ke

rasm ke ek khurdure KHanjar se

bin takbir hi

qurban hoti hai