rassi ka pul

rassī kā pul

dekhā bhālā

hachkole mānūs

girheñ jis kī uqdoñ se pur

tuul safar ik umr

rassī kā pul ik din TuuTā

aur musāfir girte girte

us ke donoñ TukḌe thāme

ḳhud pul ban kar beach meñ laTkā jhuul rahā thā

saikḌoñ āñkhoñ ke jhurmuT meñ

vo maslūb tamāsha ban kar

TuuTe pul ko joḌ rahā thā

ūñchā.ī par donoñ siroñ kī jānib be-rahmī se khiñchtī

ziddī rassī

tund havā kī paiham aaḌī tirchhī kīleñ

gahrā.ī meñ bahtā paanī aur chaTTāneñ

aur havā meñ do baazū shal

is muTThī se us muTThī tak hashr bapā thā

paanī aur havā ke shor meñ shiryānoñ kā ḳhuun ho jaise

aur tanāv chīḳh rahā ho

apnī āñkheñ khol ke dekho

rassī ban ga.e haath tumhāre

tum ḳhud apnā kaffāra ho

hiile lo yaah hiile lo yaah

ab jī uTTho jashn manāo

lambe safar se tum ko aaj najāt milī hai

rassi ka pul

dekha bhaala

hachkole manus

girhen jis ki uqdon se pur

tul safar ek umr

rassi ka pul ek din TuTa

aur musafir girte girte

us ke donon TukDe thame

KHud pul ban kar beach mein laTka jhul raha tha

saikDon aankhon ke jhurmuT mein

wo maslub tamasha ban kar

TuTe pul ko joD raha tha

unchai par donon siron ki jaanib be-rahmi se khinchti

ziddi rassi

tund hawa ki paiham aaDi tirchhi kilen

gahrai mein bahta pani aur chaTTanen

aur hawa mein do bazu shal

is muTThi se us muTThi tak hashr bapa tha

pani aur hawa ke shor mein shiryanon ka KHun ho jaise

aur tanaw chiKH raha ho

apni aankhen khol ke dekho

rassi ban gae hath tumhaare

tum KHud apna kaffara ho

hile lo yah hile lo yah

ab ji uTTho jashn manao

lambe safar se tum ko aaj najat mili hai