rasul-e-kazib

rasūl-e-maslūb ke do hazār barsoñ ke ba.ad ye vāqi.a huā

ye us zamāne kī baat hai jab rasūl-e-ḳhurshīd rās-ul-aflāk par chamaktā thā

vo ik zamistāñ kī nīm-shab kā samāñ thā

vo nīm-shab ik raqīq chādar na jaane kab se zamīñ ke murdār kālbad par

paḌī huī hai aur us ke masmūm rauzanoñ se gale saḌe jism kā ta.affun ubal rahā hai

shajar hajar dhund ke kafan meñ chhupī huī ḳhāmushī ke siine meñ chubh rahe the

anāsir-e-vaqt munjamid the

tamām rūheñ fishār-e-marqad meñ mubtilā thiiñ

aur aise hañgām meñ ik āvāz-e-nūr afgan

zuhūr-e-ḳhurshīd kī bashārat se dasht o dar ko jalā rahī thī

hazār-hā shab-gazīdgāñ ke hujūm se maiñ ne us ko dekhā

vo ḳhūn-e-ādam meñ apnī zinda ḳhizāñ-zada uñgliyāñ Dubo.e khaḌā thā

hujūm se ek ik gunahgār ko bulātā aur us ke māthe pe kalma-e-sub.h likh rahā thā

tamām murde ḳhizāñ-zada uñgliyoñ ke chhūne se jāgte the

gunāhgār-e-nafs thā maiñ bhī

ummīd-vār-e-shifā thā maiñ bhī

phir us zamistāñ kī nīm-shab meñ hazār lamhāt shaaq guzre

aur ek lamhe ne mere zaḳhm-e-jigar ko chhū kar kahā

madavā-e-ġham kī saa.at qarīb hai

sajda-rez ho jā

ye us zamāne kī baat hai jab zamīn ke be-shumār murde lahū kā baptisma le rahe the

lahū kā baptisma le rahe haiñ

rasūl-e-ḳhurshīd kī sadā bhī to mar ga.ī thī kohar meñ vo kho gayā aur

usī zamistāñ kī nīm-shab meñ ḳhabar milī hai

usī shabistān-e-nūr-o-nik.hat meñ be-kafan laash par vo baiThā huā hai

apne ḳhizāñ-zada haath se kisī ke lahū kī taqtīr kar rahā hai

aur apne kaase ko bhar rahā hai

ḳhabar milī hai,

lahū vo ḳhurshīd kā lahū hai

rasul-e-maslub ke do hazar barson ke baad ye waqia hua

ye us zamane ki baat hai jab rasul-e-KHurshid ras-ul-aflak par chamakta tha

wo ek zamistan ki nim-shab ka saman tha

wo nim-shab ek raqiq chadar na jaane kab se zamin ke murdar kalbad par

paDi hui hai aur us ke masmum rauzanon se gale saDe jism ka taffun ubal raha hai

shajar hajar dhund ke kafan mein chhupi hui KHamushi ke sine mein chubh rahe the

anasir-e-waqt munjamid the

tamam ruhen fishaar-e-marqad mein mubtila thin

aur aise hangam mein ek aawaz-e-nur afgan

zuhur-e-KHurshid ki bashaarat se dasht o dar ko jala rahi thi

hazar-ha shab-gazidgan ke hujum se main ne us ko dekha

wo KHun-e-adam mein apni zinda KHizan-zada ungliyan Duboe khaDa tha

hujum se ek ek gunahgar ko bulata aur us ke mathe pe kalma-e-subh likh raha tha

tamam murde KHizan-zada ungliyon ke chhune se jagte the

gunahgar-e-nafs tha main bhi

ummid-war-e-shifa tha main bhi

phir us zamistan ki nim-shab mein hazar lamhat shaq guzre

aur ek lamhe ne mere zaKHm-e-jigar ko chhu kar kaha

madawa-e-gham ki saat qarib hai

sajda-rez ho ja

ye us zamane ki baat hai jab zamin ke be-shumar murde lahu ka baptisma le rahe the

lahu ka baptisma le rahe hain

rasul-e-KHurshid ki sada bhi to mar gai thi kohar mein wo kho gaya aur

usi zamistan ki nim-shab mein KHabar mili hai

usi shabistan-e-nur-o-nikhat mein be-kafan lash par wo baiTha hua hai

apne KHizan-zada hath se kisi ke lahu ki taqtir kar raha hai

aur apne kase ko bhar raha hai

KHabar mili hai,

lahu wo KHurshid ka lahu hai