raushni ka suragh

hamāre zehnoñ pe

kitnī sadiyoñ ke

muhīb añdhere kī hukmarānī meñ

ek mehr-e-lā-zavāl chamkā

tārīk rāhoñ ko raushnī kā surāġh milā

nigāh-o-dil ko

na.ī manziloñ

na.ī rif.atoñ

na.ī azmatoñ

kā pata batā kar

amal kī ik sham-e-nau jalā kar

jis ne

hamāre vijdān-o-idrāk ko jhiñjhoḌā

ġhunūdgī ke shikār-e-ehsās ko jagāyā

shu.ūr kī be-hisī ko

ik irti.āsh kī kaifiyat atā kī

vo jāntā thā ki

ziist ke is be-nūr sahrā meñ

vaqār-e-millat kahāñ nihāñ hai

uruuj kī dāstāñ ke āġhāz kā ujālā kahāñ chhupā hai

vo jāntā thā

ki tārīḳh-e-aqvām-e-ālam meñ

zinda qaumoñ kī shanāḳht

ilm kī badaulat hai

aur

ilm se duur rahne vaalī qaumeñ

ik kāsa-e-tahī ke sivā kuchh bhī nahīñ haiñ

use

is rāz-e-sar-basta kā irfān ho chukā thā

ki ilm hī hai

vaqār-e-hastī

bahār-e-hastī

isī liye aaj us ke dar par

jabīn-e-ālam jhukī huī hai

hamare zehnon pe

kitni sadiyon ke

muhib andhere ki hukmarani mein

ek mehr-e-la-zawal chamka

tarik rahon ko raushni ka suragh mila

nigah-o-dil ko

nai manzilon

nai rifaton

nai azmaton

ka pata bata kar

amal ki ek sham-e-nau jala kar

jis ne

hamare wijdan-o-idrak ko jhinjhoDa

ghunudgi ke shikar-e-ehsas ko jagaya

shuur ki be-hisi ko

ek irtiash ki kaifiyat ata ki

wo jaanta tha ki

zist ke is be-nur sahra mein

waqar-e-millat kahan nihan hai

uruj ki dastan ke aaghaz ka ujala kahan chhupa hai

wo jaanta tha

ki tariKH-e-aqwam-e-alam mein

zinda qaumon ki shanaKHt

ilm ki badaulat hai

aur

ilm se dur rahne wali qaumen

ek kasa-e-tahi ke siwa kuchh bhi nahin hain

use

is raaz-e-sar-basta ka irfan ho chuka tha

ki ilm hi hai

waqar-e-hasti

bahaar-e-hasti

isi liye aaj us ke dar par

jabin-e-alam jhuki hui hai