raushni

manāzir sab usī ik raushnī par munhasir haiñ

jo dil kī munhamik partoñ ko jab bhī phāñd kar aatī hai

is pahnā-e-ārī meñ

to apne zāviyoñ ke tāne-bāne se

bashar kī aañkh kā māhaul buntī hai

yahī māhaul jab simTe to ik tīkhī kiran ban kar

subuk-sar chiir ke shabnam kī har ik buuñd kā siina

kalī kī aabrū chhū le

lab-o-lahja kā andāz-e-numū chhū le

yahī māhaul jab phaile

to gul-būTe

mahakte marġh-zāroñ shāḳh-sāroñ kohsāroñ ko

haTīle pattharoñ par raqs karte ābshāroñ ko

samo kar apne be-pāyāñ machalte dā.eroñ meñ

shu.ūr-e-husn se apne

bisāt-e-shauq ik ta.amīr kar le

bisāt-e-shauq ko apnī

kisī firdaus se ta.abīr kar le

manazir sab usi ek raushni par munhasir hain

jo dil ki munhamik parton ko jab bhi phand kar aati hai

is pahna-e-ari mein

to apne zawiyon ke tane-bane se

bashar ki aankh ka mahaul bunti hai

yahi mahaul jab simTe to ek tikhi kiran ban kar

subuk-sar chir ke shabnam ki har ek bund ka sina

kali ki aabru chhu le

lab-o-lahja ka andaz-e-numu chhu le

yahi mahaul jab phaile

to gul-buTe

mahakte margh-zaron shaKH-saron kohsaron ko

haTile pattharon par raqs karte aabshaaron ko

samo kar apne be-payan machalte daeron mein

shuur-e-husn se apne

bisat-e-shauq ek tamir kar le

bisat-e-shauq ko apni

kisi firdaus se tabir kar le