raushni

vo jo zindagī kā qarār thī

vahī sub.h-e-nūr kahāñ ga.ī

vo jo ḳhvāb-e-nāz the kyā hue

mai-e-pur-surūr kahāñ ga.ī

vo jo intizār-e-qarār thā

vahī intizār-e-qarār hai

vo dukhan hai dil meñ nihāñ abhī

dil-e-nā-subūr kahāñ ga.ī

vahī tīrgī kā hisār hai

shab-o-roz par mah-o-sāl hai

hai javār-e-qalb pe tīrgī

abhī dil se duur kahāñ ga.ī

mire shahryār tirī samā.at-e-shauq besh

magar yahāñ

vo hai kaun jis ne fuġhāñ na kī

pe tire huzūr kahāñ ga.ī

yahāñ ab ma.āl-e-guzishta-shab

na.ī ek shab kā nafāz hai

vo jo sub.h-e-fardā kī aarzū thī

thakan se chuur kahāñ ga.ī

usī tīrgī meñ ye nuur kī

jo lakīr phūTī hai aah se

ajab ek manzar-e-jāñ-fazā

ki guzar rahā hai nigāh se

abhī kaun qarya-e-jāñ se

sū-e-adam ga.e haiñ lahū lahū

ki ajab charāġh se jal uThe

sar-e-qatl-gāh gulū gulū

isī raushnī meñ tamām chehre

ki aa.e jaate haiñ rū-ba-rū

koī sar-kashīda-o-ḳhanda-zan

koī sar-ḳhamīda siyāh-rū

wo jo zindagi ka qarar thi

wahi subh-e-nur kahan gai

wo jo KHwab-e-naz the kya hue

mai-e-pur-surur kahan gai

wo jo intizar-e-qarar tha

wahi intizar-e-qarar hai

wo dukhan hai dil mein nihan abhi

dil-e-na-subur kahan gai

wahi tirgi ka hisar hai

shab-o-roz par mah-o-sal hai

hai jawar-e-qalb pe tirgi

abhi dil se dur kahan gai

mere shahryar teri samaat-e-shauq besh

magar yahan

wo hai kaun jis ne fughan na ki

pe tere huzur kahan gai

yahan ab maal-e-guzishta-shab

nai ek shab ka nafaz hai

wo jo subh-e-farda ki aarzu thi

thakan se chur kahan gai

usi tirgi mein ye nur ki

jo lakir phuTi hai aah se

ajab ek manzar-e-jaan-faza

ki guzar raha hai nigah se

abhi kaun qarya-e-jaan se

su-e-adam gae hain lahu lahu

ki ajab charagh se jal uThe

sar-e-qatl-gah gulu gulu

isi raushni mein tamam chehre

ki aae jate hain ru-ba-ru

koi sar-kashida-o-KHanda-zan

koi sar-KHamida siyah-ru