remote

damakte chehre ghanerī zulfeñ

ye sarsarāte havāoñ jaise libās jismoñ kā bāñkpan dilrubā adā.eñ

ye jhilmilāte makān rañgīn shahr chamkīlī careñ

ye sab manāzir jo rāhatoñ ke sarāb dikhlā ke

ḳhvāhishoñ ke latīf paikar tarāsh kar ḳhvāb bechte haiñ

bahut hasīñ haiñ

ye kyā huā bas palak jhapakte hī saare manzar badal ga.e haiñ

ye ḳhuuñ meñ Duube hue manāzir kahāñ se aa.e

ye maañ kahāñ kī hai kaun hai apne beTe kī laash par sar paTak rahī hai

nayā dhamāka kahāñ huā hai

ye kaun haiñ kyā shahīd haiñ jin ke jismoñ se bam bañdhe haiñ

jo in dhamākoñ meñ jāñ-ba-haq saikḌoñ hue haiñ

shahīd vo haiñ

ye kaun sā shahr kyā jagah hai

jahāñ pe sailāb ne phir se qahr Dhāyā

ye zalzala phir kahāñ pe aayā

fasād phir ho gayā kahīñ par

ye kyā jagah hai

ye kaun ma.asūm bachchiyoñ ke burīda jismoñ ko DhūñDhtā hai

ye barbariyat ke sansanī-ḳhez manzar

bahut hī tafsīl se chal rahe haiñ

kahāñ kahāñ se talāsh kar ke dikhā rahe haiñ

mujhe pata hai

ye ālamī gaañv kā hai manzar

are ḳhudā ke liye badal do

remote laao baTan dabāo

ye Thiik hai haañ ye hī lagā lo

sajī banī auratoñ ke qisse jo apne jannat-numā makānoñ meñ

jaal sāzish ke bun rahī haiñ

ye bevafā.ī ke ranjishoñ ke

jo silsile haiñ

chalo phir in meñ hī sar khapā.eñ

ye bhuul jaa.eñ ki saarī duniyā meñ vahshatoñ kā hai raqs jaarī

damakte chehre ghaneri zulfen

ye sarsaraate hawaon jaise libas jismon ka bankpan dilruba adaen

ye jhilmilate makan rangin shahr chamkili caren

ye sab manazir jo rahaton ke sarab dikhla ke

KHwahishon ke latif paikar tarash kar KHwab bechte hain

bahut hasin hain

ye kya hua bas palak jhapakte hi sare manzar badal gae hain

ye KHun mein Dube hue manazir kahan se aae

ye man kahan ki hai kaun hai apne beTe ki lash par sar paTak rahi hai

naya dhamaka kahan hua hai

ye kaun hain kya shahid hain jin ke jismon se bam bandhe hain

jo in dhamakon mein jaan-ba-haq saikDon hue hain

shahid wo hain

ye kaun sa shahr kya jagah hai

jahan pe sailab ne phir se qahr Dhaya

ye zalzala phir kahan pe aaya

fasad phir ho gaya kahin par

ye kya jagah hai

ye kaun masum bachchiyon ke burida jismon ko DhunDhta hai

ye barbariyat ke sansani-KHez manzar

bahut hi tafsil se chal rahe hain

kahan kahan se talash kar ke dikha rahe hain

mujhe pata hai

ye aalami ganw ka hai manzar

are KHuda ke liye badal do

remote lao baTan dabao

ye Thik hai han ye hi laga lo

saji bani auraton ke qisse jo apne jannat-numa makanon mein

jal sazish ke bun rahi hain

ye bewafai ke ranjishon ke

jo silsile hain

chalo phir in mein hi sar khapaen

ye bhul jaen ki sari duniya mein wahshaton ka hai raqs jari