aazadi

pūchhtā hai to ki kab aur kis tarah aatī huuñ maiñ

god meñ nākāmiyoñ ke parvarish paatī huuñ maiñ

sirf vo maḳhsūs siine haiñ mirī ārām-gāh

aarzū kī tarah rah jaatī hai jin meñ ghuT ke aah

ahl-e-ġham ke saath un kā dard-o-ġham sahtī huuñ maiñ

kāñpte hoñToñ pe ban kar bad-duā rahtī huuñ maiñ

raqs kartī haiñ ishāroñ par mire maut-o-hayāt

dekhtī rahtī huuñ maiñ har-vaqt nabz-e-kā.enāt

ḳhud-farebī baḌh ke jab bantī hai ehsās-e-shu.ūr

jab javāñ hotā hai ahl-e-zar ke tevar meñ ġhurūr

muflisī se karte haiñ jab ādamiyat ko judā

jab lahū piite haiñ tahzīb-o-tamaddun ke ḳhudā

bhuut ban kar nāchtā hai sar pe jab qaumī vaqār

le ke maz.hab kī sipar aatā hai jab sarmāya-dār

rāste jab band hote haiñ duāoñ ke liye

aadmī laḌtā hai jab jhūTe ḳhudāoñ ke liye

zindagī insāñ kī kar detā hai jab insāñ harām

jab use qānūn-e-fitrat kā atā hotā hai naam

ahrman phirtā hai jab apnā dahan khole hue

āsmāñ se maut jab aatī hai par tole hue

jab kisānoñ kī nigāhoñ se Tapaktā hai hirās

phūTne lagtī hai jab mazdūr ke zaḳhmoñ se yaas

sabr-e-ayyūbī kā jab labrez hotā hai subū

soz-e-ġham se khaultā hai jab ġhulāmoñ kā lahu

ġhāsiboñ se baḌh ke jab kartā hai haq apnā savāl

jab nazar aatā hai mazlūmoñ ke chehroñ par jalāl

tafraqa paḌtā hai jab duniyā meñ nasl-o-rañg kā

le ke maiñ aatī huuñ parcham inqilāb-o-jañg kā

haañ magar jab TuuT jaatī hai havādis kī kamand

jab kuchal detā hai har shai ko baġhāvat kā samand

jab nigal letā hai tūfāñ baḌh ke kashtī nuuh kī

ghuT ke jab insān meñ rah jaatī hai azmat ruuh kī

duur ho jaatī hai jab mazdūroñ ke dil kī jalan

jab tabassum ban ke hoñToñ par simaTtī hai thakan

jab ubhartā hai ufuq se zindagī kā āftāb

jab nikhartā hai lahū kī aag meñ tap kar shabāb

nasl qaumiyyat kalīsā saltanat tahzīb-o-rañg

rauñd chuktī hai jab in sab ko javānī kī umañg

sub.h ke zarrīñ tabassum meñ ayaañ hotī huuñ maiñ

rif.at-e-arsh-e-barīñ se par-fishāñ hotī huuñ maiñ

puchhta hai to ki kab aur kis tarah aati hun main

god mein nakaamiyon ke parwarish pati hun main

sirf wo maKHsus sine hain meri aaram-gah

aarzu ki tarah rah jati hai jin mein ghuT ke aah

ahl-e-gham ke sath un ka dard-o-gham sahti hun main

kanpte honTon pe ban kar bad-dua rahti hun main

raqs karti hain ishaaron par mere maut-o-hayat

dekhti rahti hun main har-waqt nabz-e-kaenat

KHud-farebi baDh ke jab banti hai ehsas-e-shuur

jab jawan hota hai ahl-e-zar ke tewar mein ghurur

muflisi se karte hain jab aadamiyat ko juda

jab lahu pite hain tahzib-o-tamaddun ke KHuda

bhut ban kar nachta hai sar pe jab qaumi waqar

le ke mazhab ki sipar aata hai jab sarmaya-dar

raste jab band hote hain duaon ke liye

aadmi laDta hai jab jhuTe KHudaon ke liye

zindagi insan ki kar deta hai jab insan haram

jab use qanun-e-fitrat ka ata hota hai nam

ahrman phirta hai jab apna dahan khole hue

aasman se maut jab aati hai par tole hue

jab kisanon ki nigahon se Tapakta hai hiras

phuTne lagti hai jab mazdur ke zaKHmon se yas

sabr-e-ayyubi ka jab labrez hota hai subu

soz-e-gham se khaulta hai jab ghulamon ka lahu

ghasibon se baDh ke jab karta hai haq apna sawal

jab nazar aata hai mazlumon ke chehron par jalal

tafraqa paDta hai jab duniya mein nasl-o-rang ka

le ke main aati hun parcham inqilab-o-jang ka

han magar jab TuT jati hai hawadis ki kamand

jab kuchal deta hai har shai ko baghawat ka samand

jab nigal leta hai tufan baDh ke kashti nuh ki

ghuT ke jab insan mein rah jati hai azmat ruh ki

dur ho jati hai jab mazduron ke dil ki jalan

jab tabassum ban ke honTon par simaTti hai thakan

jab ubharta hai ufuq se zindagi ka aaftab

jab nikharta hai lahu ki aag mein tap kar shabab

nasl qaumiyyat kalisa saltanat tahzib-o-rang

raund chukti hai jab in sab ko jawani ki umang

subh ke zarrin tabassum mein ayan hoti hun main

rifat-e-arsh-e-barin se par-fishan hoti hun main