restaurant

restaurant meñ saje hue haiñ kaise kaise chehre

qabroñ ke katboñ par jaise masle masle sehre

ik sāhib jo soch rahe haiñ pichhle ek pahar se

yuuñ lagte haiñ jaise bachcha ruuTh aayā ho ghar se

kaafī kī pyālī ko laboñ tak laa.eñ to kaise laa.eñ

baire tak se aañkh milā kar baat jo na kar paa.eñ

kitnī sanjīda baiThī hai ye ahbāb kī Tolī

kitne auj-e-balāġhat par hai ḳhāmoshī kī bolī

saarī quvvat chuus chukī din bhar kī shahr-navardī

māthoñ meñ se jhāñk rahī hai martī dhuup kī zardī

lambī lambī palkeñ jhapke ik sharmīlī bī-bī

bāloñ kī tartīb se jhalke zehn kī be-tartībī

shauhar ko dekhe to lajā.e laaj ko oT banā.e

har aane vaale par ik bharpūr nazar dauḌāye

ik laḌkī aur tiin javān aa.e haiñ kase-kasā.e

sāñvle ruup ko gore mulkoñ kā bahrūp banā.e

bātoñ meñ naḳhvat bāġhoñ kī vahshat sahrāoñ kī

āñkhoñ ke chūlhoñ meñ bharī hai raakh tamannāoñ kī

apnī apnī uljhan sab kī apnī apnī raa.e

sab ne aañsū rok rakhe haiñ kaun kise bahlā.e

har shai par shak ho to jiinā ek sazā ban jaa.e

mehvar hī maujūd na ho to gardish kis kaam aa.e

qahqahe jaise ḳhālī bartan luḌhak luḌhak kar TūTeñ

bahseñ jaise hoñToñ meñ se ḳhuun ke chhīñTe chhūTeñ

husn kā zikr kareñ yuuñ jaise āñdhī phuul khilā.e

fan kī baat kareñ yuuñ jaise baniyā sher sunā.e

sukḌī simTī rūheñ lekin jism haiñ dohre tihre

restaurant meñ saje hue haiñ kaise kaise chehre

restaurant mein saje hue hain kaise kaise chehre

qabron ke katbon par jaise masle masle sehre

ek sahib jo soch rahe hain pichhle ek pahar se

yun lagte hain jaise bachcha ruTh aaya ho ghar se

kafi ki pyali ko labon tak laen to kaise laen

baire tak se aankh mila kar baat jo na kar paen

kitni sanjida baiThi hai ye ahbab ki Toli

kitne auj-e-balaghat par hai KHamoshi ki boli

sari quwwat chus chuki din bhar ki shahr-nawardi

mathon mein se jhank rahi hai marti dhup ki zardi

lambi lambi palken jhapke ek sharmili bi-bi

baalon ki tartib se jhalke zehn ki be-tartibi

shauhar ko dekhe to lajae laj ko oT banae

har aane wale par ek bharpur nazar dauDaye

ek laDki aur tin jawan aae hain kase-kasae

sanwle rup ko gore mulkon ka bahrup banae

baaton mein naKHwat baghon ki wahshat sahraon ki

aankhon ke chulhon mein bhari hai rakh tamannaon ki

apni apni uljhan sab ki apni apni rae

sab ne aansu rok rakhe hain kaun kise bahlae

har shai par shak ho to jina ek saza ban jae

mehwar hi maujud na ho to gardish kis kaam aae

qahqahe jaise KHali bartan luDhak luDhak kar TuTen

bahsen jaise honTon mein se KHun ke chhinTe chhuTen

husn ka zikr karen yun jaise aandhi phul khilae

fan ki baat karen yun jaise baniya sher sunae

sukDi simTi ruhen lekin jism hain dohre tihre

restaurant mein saje hue hain kaise kaise chehre