ret aaina hai

qais āsūda-e-naqsh raqs-e-ravāñ

hairat-e-chashm pārīna hai

ret ā.īna hai

aur zañgār-e-ā.īna har ālam-e-chaub-o-abresham-o-ḳhāk-dāñ

ret ā.īna hai

jab manāroñ meñ ghanTī bajī

vo achānak muḌī kal yahāñ koī thā

vo gajar dam uThī

us ne añgḌā.ī lī kal yahāñ koī thā

saañp lahrātī saḌkoñ pe chalte hue vo rukī

kal yahāñ koī thā

kal yahāñ kaun thā

qais āsūda-e-naqsh raqs-e-ravāñ

kaun sūraj ko añgār-zādoñ ke ghar le gayā

kal yahāñ bin murādoñ kī bārish kā pahlā phuvārā paḌā

qais āgāh-e-dād-o-rasad

qais be-kīn-o-kad

ret ā.īna hai aur zañgār-e-ā.īna har ālam-e-chaub-o-abresham-o-ḳhāk-dāñ

ḳhauf ik sāya-e-sā.ibāñ

saare ghar band haiñ

saare ghar band haiñ aur darīchoñ pe baiThī huī laḌkiyāñ mujh pe hañsne lagīñ

niiñd ik chāñdnī

niiñd patthar pe phailī huī chāñdnī

kaun patthar pe chaltā rahe aur sambhaltā rahe

kaun sotā rahe

ret ā.īna hai

qais āsūda-e-naqsh raqs-e-ravāñ

hairat-e-chashm pārīna hai

ret ā.īna hai

qais aasuda-e-naqsh raqs-e-rawan

hairat-e-chashm parina hai

ret aaina hai

aur zangar-e-aina har aalam-e-chaub-o-abresham-o-KHak-dan

ret aaina hai

jab manaron mein ghanTi baji

wo achanak muDi kal yahan koi tha

wo gajar dam uThi

us ne angDai li kal yahan koi tha

sanp lahraati saDkon pe chalte hue wo ruki

kal yahan koi tha

kal yahan kaun tha

qais aasuda-e-naqsh raqs-e-rawan

kaun suraj ko angar-zadon ke ghar le gaya

kal yahan bin muradon ki barish ka pahla phuwara paDa

qais aagah-e-dad-o-rasad

qais be-kin-o-kad

ret aaina hai aur zangar-e-aina har aalam-e-chaub-o-abresham-o-KHak-dan

KHauf ek saya-e-saiban

sare ghar band hain

sare ghar band hain aur darichon pe baiThi hui laDkiyan mujh pe hansne lagin

nind ek chandni

nind patthar pe phaili hui chandni

kaun patthar pe chalta rahe aur sambhalta rahe

kaun sota rahe

ret aaina hai

qais aasuda-e-naqsh raqs-e-rawan

hairat-e-chashm parina hai

ret aaina hai