ret ka musafir

ret kā musāfir thā raat kī havelī meñ

sirf raat bhar Thahrā jog le liyā us ne

ret kī hathelī se phuul ret ke chun kar

ḳhvāb kī sahelī se rog le liyā us ne

sirf ek lamhe kī muḳhtasar kahānī ko

ret ke musāfir ne yuuñ amar banā Daalā

kāsa-e-mohabbat meñ le ke bhiik lafzoñ kī

aarzū kī āñkhoñ meñ ashk-e-tar banā Daalā

kaun ab tujhe jaane kaun yaad rakkhegā

vaqt kī uḌānoñ ke kaun āsmānoñ meñ

tū ne rog paalā thā kis tarah guzārā thā

ek pal ke jīvan ko ajnabī makānoñ meñ

aaj apne shā.ir ko ye hameñ batānā hai

tū jo aag meñ jal kar gulsitāñ banātā hai

harf harf chun kar motiyoñ kī laḌiyoñ se

sub.h ke sitāroñ tak sehn-e-dil sajātā hai

jo bhī tū ne likkhā hai sirf terī pūñjī hai

sirf ek lamha hai sirf ek saa.at hai

vaqt ke samundar meñ sirf ik yahī lamha

be-karāñ alāmat hai jazb-e-dil kī chāhat hai

ret ka musafir tha raat ki haweli mein

sirf raat bhar Thahra jog le liya us ne

ret ki hatheli se phul ret ke chun kar

KHwab ki saheli se rog le liya us ne

sirf ek lamhe ki muKHtasar kahani ko

ret ke musafir ne yun amar bana Dala

kasa-e-mohabbat mein le ke bhik lafzon ki

aarzu ki aankhon mein ashk-e-tar bana Dala

kaun ab tujhe jaane kaun yaad rakkhega

waqt ki uDanon ke kaun aasmanon mein

tu ne rog pala tha kis tarah guzara tha

ek pal ke jiwan ko ajnabi makanon mein

aaj apne shair ko ye hamein batana hai

tu jo aag mein jal kar gulsitan banata hai

harf harf chun kar motiyon ki laDiyon se

subh ke sitaron tak sehn-e-dil sajata hai

jo bhi tu ne likkha hai sirf teri punji hai

sirf ek lamha hai sirf ek saat hai

waqt ke samundar mein sirf ek yahi lamha

be-karan alamat hai jazb-e-dil ki chahat hai