rewaD

shaam kī raakh meñ luthḌī huī Dhalvānoñ par

ek revaḌ ke thake qadmoñ kā maddham āhañg

jis kī har lahar dhuñdlakoñ meñ luḌhak jaatī hai

mast charvāhā charā-gāh kī ik choTī se

jab utartā hai to zaitūn kī lāñbī soñTī

kisī jaltī huī badlī meñ aTak jaatī hai

bakriyāñ dasht kī mahkār meñ gūñdhā huā duudh

chhāgaloñ meñ liye jab raqs-kunāñ aatī haiñ

koī chūḌī ḳham-e-daurāñ pe chhanak jaatī hai

jast bhartī hai kabhī aur kabhī chalte chalte

nāchtī Daar mimakate hue buzġhāloñ kī

har jhukī shāḳh kī chaukhaT pe ThiThuk jaatī hai

saan par laakh chhurī siiḳh pe sad-pāra gosht

phir bhī mad.hosh ġhazāloñ kī ye Tolī hai ki jo

baar baar apne ḳhat-e-rah se bhaTak jaatī hai

shaam kī raakh meñ luthḌī huī Dhalvānoñ par

kheltī hai ġham hastī kī vo shādāñ sī umañg

jis kī rau vaqt kī pahnā.iyoñ tak jaatī hai

sham ki rakh mein luthDi hui Dhalwanon par

ek rewaD ke thake qadmon ka maddham aahang

jis ki har lahar dhundlakon mein luDhak jati hai

mast charwaha chara-gah ki ek choTi se

jab utarta hai to zaitun ki lanbi sonTi

kisi jalti hui badli mein aTak jati hai

bakriyan dasht ki mahkar mein gundha hua dudh

chhagalon mein liye jab raqs-kunan aati hain

koi chuDi KHam-e-dauran pe chhanak jati hai

jast bharti hai kabhi aur kabhi chalte chalte

nachti Dar mimakate hue buzghaalon ki

har jhuki shaKH ki chaukhaT pe ThiThuk jati hai

san par lakh chhuri siKH pe sad-para gosht

phir bhi madhosh ghazalon ki ye Toli hai ki jo

bar bar apne KHat-e-rah se bhaTak jati hai

sham ki rakh mein luthDi hui Dhalwanon par

khelti hai gham hasti ki wo shadan si umang

jis ki rau waqt ki pahnaiyon tak jati hai