reza-e-wajud

mire vajūd kā makān

ḳhār-dār taar kā hisār jis ke ird-gird

aadmī kā ḳhuun piine vaalī zard jhāḌiyoñ ke ḳhār-dār haat haiñ

mirī zamīñ ke ird-gird

kahkashāñ ke ḳhār-dār dā.eroñ kā raqs hai

zamīñ se āsmān tak

vajūd apne an-ginat havās kā gunāh hai

shu.ūr-o-lams-o-lazzat-o-maqām ke sarāb haiñ

maiñ pūchhtā huuñ sang meñ gudāz pamba DhūñDne se kyā milā

ye zindagī yahī to hai

ki reza reza jam.a kī huī matā-e-zīst ko

havā-e-tund pheñk aa.e dasht-e-be-savād meñ

mirī nazar ke sāmne

na jaane kitne jism the ki TuuT kar bikhar ga.e

maiñ aise haul-nāk tajraboñ ke baa'd baar baar

ḳhud ko yuuñ sañbhāltā huuñ jaise apne haat se

maiñ gir ke TuuT jā.ūñgā

mirā badan aziyyatoñ kā ḳhvān hai

kabhī maiñ barf kī siloñ kī huuñ ġhizā

kabhī maiñ tīrgī kā rizq huuñ

kabhī mire liye hai nok-dār ḳhanjaroñ kā Taḳht-e-ḳhvāb

aur aaj un aziyyatoñ ke darmiyāñ

mirā vajūd jaise mujh ko chhoḌ kar chalā gayā

maiñ barg-e-sabz thā jise

ḳhizāñ kā haat shāḳh-e-tar se toḌ kar chalā gayā

maiñ ek samt falsafe ke an-ginat nikāt kī panāh huuñ

aur ek samt āgahī ke jabr kī karāh huuñ

musābqat ke daur meñ vo sā.ateñ bhī aa ga.iiñ

ki husn aur ishq meñ matā.a aur mushtarī kā ramz jāgne lagā

na ishq itnā be-ḳhabar

na husn itnā mo'atabar

ki be-dalīl qaziya-e-vafā kī daad de sake

ye kā.enāt be-hisī kī ik basīt shakl hai

na zindagī kā kuchh asar

na maut se koī ḳhatar

ab aisī kā.enāt meñ

is ek reza-e-vajūd ke havās kyā kareñ

ab aise sard jism kī barahnagī ko dekh kar

ḳhulūs-o-mehr-o-lutf ke hasīñ libās kyā kareñ

mere wajud ka makan

KHar-dar tar ka hisar jis ke ird-gird

aadmi ka KHun pine wali zard jhaDiyon ke KHar-dar hat hain

meri zamin ke ird-gird

kahkashan ke KHar-dar daeron ka raqs hai

zamin se aasman tak

wajud apne an-ginat hawas ka gunah hai

shuur-o-lams-o-lazzat-o-maqam ke sarab hain

main puchhta hun sang mein gudaz pamba DhunDne se kya mila

ye zindagi yahi to hai

ki reza reza jama ki hui mata-e-zist ko

hawa-e-tund phenk aae dasht-e-be-sawad mein

meri nazar ke samne

na jaane kitne jism the ki TuT kar bikhar gae

main aise haul-nak tajrabon ke ba'd bar bar

KHud ko yun sanbhaalta hun jaise apne hat se

main gir ke TuT jaunga

mera badan aziyyaton ka KHwan hai

kabhi main barf ki silon ki hun ghiza

kabhi main tirgi ka rizq hun

kabhi mere liye hai nok-dar KHanjaron ka TaKHt-e-KHwab

aur aaj un aziyyaton ke darmiyan

mera wajud jaise mujh ko chhoD kar chala gaya

main barg-e-sabz tha jise

KHizan ka hat shaKH-e-tar se toD kar chala gaya

main ek samt falsafe ke an-ginat nikat ki panah hun

aur ek samt aagahi ke jabr ki karah hun

musabqat ke daur mein wo saaten bhi aa gain

ki husn aur ishq mein mataa aur mushtari ka ramz jagne laga

na ishq itna be-KHabar

na husn itna mo'atabar

ki be-dalil qaziya-e-wafa ki dad de sake

ye kaenat be-hisi ki ek basit shakl hai

na zindagi ka kuchh asar

na maut se koi KHatar

ab aisi kaenat mein

is ek reza-e-wajud ke hawas kya karen

ab aise sard jism ki barahnagi ko dekh kar

KHulus-o-mehr-o-lutf ke hasin libas kya karen