rihai

asiir logo

uTho aur uTh kar pahāḌ kaaTo

pahāḌ murda rivāyatoñ ke

pahāḌ andhī aqīdatoñ ke

pahāḌ zālim adāvatoñ ke

hamāre jismoñ ke qaid-ḳhānoñ meñ

saikḌoñ be-qarār jism

aur udaas rūheñ sisak rahī haiñ

vo ziina ziina bhaTak rahī haiñ

ham in ko āzād kab kareñge

hamārā honā

hamārī in aane vaalī nasloñ ke vāste hai

ham in ke maqrūz haiñ

jo ham se vajūd leñge numūd leñge

kaTe hue ek sar se lākhoñ saroñ kī taḳhlīq

ab kahānī nahīñ rahī hai

lahū meñ jo shai dhaḌak rahī hai gamak rahī hai

hazāroñ āñkheñ

badan ke ḳhaliyoñ se jhāñktī be-qarār āñkheñ

ye kah rahī haiñ

asiir logoñ

jo zard patthar ke ghar meñ

yuuñ be-hisī kī chādar lapeT kar so rahe haiñ

un ko kaho ki uTh kar pahāḌ kāTeñ

hameñ rihā.ī kī sochnā hai

asir logo

uTho aur uTh kar pahaD kaTo

pahaD murda riwayaton ke

pahaD andhi aqidaton ke

pahaD zalim adawaton ke

hamare jismon ke qaid-KHanon mein

saikDon be-qarar jism

aur udas ruhen sisak rahi hain

wo zina zina bhaTak rahi hain

hum in ko aazad kab karenge

hamara hona

hamari in aane wali naslon ke waste hai

hum in ke maqruz hain

jo hum se wajud lenge numud lenge

kaTe hue ek sar se lakhon saron ki taKHliq

ab kahani nahin rahi hai

lahu mein jo shai dhaDak rahi hai gamak rahi hai

hazaron aankhen

badan ke KHaliyon se jhankti be-qarar aankhen

ye kah rahi hain

asir logon

jo zard patthar ke ghar mein

yun be-hisi ki chadar lapeT kar so rahe hain

un ko kaho ki uTh kar pahaD kaTen

hamein rihai ki sochna hai