rihai

duur ik shor uThā shahr ke hangāmoñ meñ

ik ghaḌī bhar ke liye uTh ke kahīñ Duub gayā

ik ghaḌī bhar ke liye guuñj uThā sehan-e-qafas

baT ga.ī dard kī tauqīr ka.ī nāmoñ meñ

guuñj uThā sehan-e-qafas dard kī zanjīroñ se

aur sar-e-dāman-e-sayyād kahīñ nam na huā

qaidiyoñ ne saf-e-mātam bhī bichā.ī lekin

shor-e-zanjīr-e-alam phir bhī magar kam na huā

jaane kis tarah se guzre sahar-o-shām apne

karvaTeñ letā rahā sej pe angāroñ kī

ek ummīd ki ik roz rihā.ī hogī

aur bulandī ki jo baḌhtī rahī dīvāroñ kī

apne hisse kī sazā kaaT ke jab ik qaidī

jaane lagtā hai qafas se to pukār uThte haiñ

dard-o-ġham halqa-e-zanjīr dar-o-bām-e-qafas

kal jo chubhte the vahī ḳhaar sadā dete haiñ

zulm-e-sayyād-o-sitam-kārī-e-zindāñ kī qasam

dard-e-insān-o-vafādārī-e-yārāñ kī qasam

shorish-e-dard-o-ġham-e-zulf-e-pareshāñ kī qasam

chashm-e-nam chāk-jigar dīda-e-hairāñ kī qasam

mehrbāñ ek na ik din to ḳhudā bhī hogā

nā-rasā aaj jo naala hai rasā bhī hogā

band hai gar dar-e-zindāñ to ye vā bhī hogā

aaj jo qaid hai ik roz rihā bhī hogā

dur ek shor uTha shahr ke hangamon mein

ek ghaDi bhar ke liye uTh ke kahin Dub gaya

ek ghaDi bhar ke liye gunj uTha sehan-e-qafas

baT gai dard ki tauqir kai namon mein

gunj uTha sehan-e-qafas dard ki zanjiron se

aur sar-e-daman-e-sayyaad kahin nam na hua

qaidiyon ne saf-e-matam bhi bichai lekin

shor-e-zanjir-e-alam phir bhi magar kam na hua

jaane kis tarah se guzre sahar-o-sham apne

karwaTen leta raha sej pe angaron ki

ek ummid ki ek roz rihai hogi

aur bulandi ki jo baDhti rahi diwaron ki

apne hisse ki saza kaT ke jab ek qaidi

jaane lagta hai qafas se to pukar uThte hain

dard-o-gham halqa-e-zanjir dar-o-baam-e-qafas

kal jo chubhte the wahi KHar sada dete hain

zulm-e-sayyaad-o-sitam-kari-e-zindan ki qasam

dard-e-insan-o-wafadari-e-yaran ki qasam

shorish-e-dard-o-gham-e-zulf-e-pareshan ki qasam

chashm-e-nam chaak-jigar dida-e-hairan ki qasam

mehrban ek na ek din to KHuda bhi hoga

na-rasa aaj jo nala hai rasa bhi hoga

band hai gar dar-e-zindan to ye wa bhi hoga

aaj jo qaid hai ek roz riha bhi hoga