rishta apne mazi ka

saikḌoñ saal kā

roz aur shab se haiñ

apne maazī ke rishte juḌe

sāhil-e-sindh par

ek duḳhānī kashtī ravāñ

jis meñ baiThe hue kuchh hasīñ naujavāñ

ik hasīñ sā kinārā jo aayā nazar

ruk ga.e log sab

aur hairat se har chiiz dekhā kiye

sar uThā.e khajūroñ ke kuchh peḌ the

sarsarātī havā

pal rahī thī jo bū-e-mohabbat kī āġhosh meñ

pattharoñ ke baḌe sāf-o-sāda makāñ

the makīñ jin ke mehr-o-mohabbat ke but

paanī mīThā bhī thā aur ḳhush-zā.eqa

in javānoñ ke dil ko fazā bhā ga.ī

zindagī jhūmī aur aise māhaul par

ruk ga.ī daf.atan

mandiroñ ke sunahre aur ūñche kalas

nuqra.ī jin kī ghanToñ kī āvāz thī

kitnī thī dil-pazīr

aur ras se bharī

naujavānoñ ke pākīza jhurmuT se ik

naujavāñ ne pukārī fajar kī azaañ

jis meñ ḳhvābīda thiiñ kitnī ra.anā.iyāñ

do sadāoñ meñ be-laus sangam huā

donoñ milte rahe

dil bhī milte ga.e

ab azaañ aur nāqūs the mushtarak

donoñ the shādmāñ

donoñ the mutma.in

donoñ milte rahe donoñ milte ga.e

mushtarak ek tahzīb paltī ga.ī

thī jo pākīza-tar

aur mehr-o-muravvat kī ā.ina-dār

jis se aa.ī gulistāñ meñ apne bahār

aaj har phuul par yuuñ jo hai tāzgī

sāl-hā-sāl kī

apnī mehnat kā samra hai ye

apne purkhoñ kī ik den hai

ġham uThā.e

jinhoñ ne magar

rishte ko aur mazbūt karte rahe

us kī kaḌiyoñ ko marbūt karte rahe

ham bhī vāris unhīñ ke haiñ

aur tum bhī ho

TūTne paa.e dhāgā na ye dekhnā

ḳhūn-e-dil se banā.eñge

motī jo ham

durr-e-shahvār āñkhoñ se Tapkā.eñ jo

gūñdh leñge usī ek rishte se ham

kyūñki maazī se apne

hameñ pyaar hai

kyūñki maazī hamārā yahī haal hai

koī ā.inda us se alag hogā kab

saikḌoñ saal ke

roz aur shab se haiñ

apne maazī ke rishte juḌe

saikDon sal ka

roz aur shab se hain

apne mazi ke rishte juDe

sahil-e-sindh par

ek duKHani kashti rawan

jis mein baiThe hue kuchh hasin naujawan

ek hasin sa kinara jo aaya nazar

ruk gae log sab

aur hairat se har chiz dekha kiye

sar uThae khajuron ke kuchh peD the

sarsaraati hawa

pal rahi thi jo bu-e-mohabbat ki aaghosh mein

pattharon ke baDe saf-o-sada makan

the makin jin ke mehr-o-mohabbat ke but

pani miTha bhi tha aur KHush-zaeqa

in jawanon ke dil ko faza bha gai

zindagi jhumi aur aise mahaul par

ruk gai dafatan

mandiron ke sunahre aur unche kalas

nuqrai jin ki ghanTon ki aawaz thi

kitni thi dil-pazir

aur ras se bhari

naujawanon ke pakiza jhurmuT se ek

naujawan ne pukari fajar ki azan

jis mein KHwabida thin kitni ranaiyan

do sadaon mein be-laus sangam hua

donon milte rahe

dil bhi milte gae

ab azan aur naqus the mushtarak

donon the shadman

donon the mutmain

donon milte rahe donon milte gae

mushtarak ek tahzib palti gai

thi jo pakiza-tar

aur mehr-o-murawwat ki aaina-dar

jis se aai gulistan mein apne bahaar

aaj har phul par yun jo hai tazgi

sal-ha-sal ki

apni mehnat ka samra hai ye

apne purkhon ki ek den hai

gham uThae

jinhon ne magar

rishte ko aur mazbut karte rahe

us ki kaDiyon ko marbut karte rahe

hum bhi waris unhin ke hain

aur tum bhi ho

TuTne pae dhaga na ye dekhna

KHun-e-dil se banaenge

moti jo hum

durr-e-shahwar aankhon se Tapkaen jo

gundh lenge usi ek rishte se hum

kyunki mazi se apne

hamein pyar hai

kyunki mazi hamara yahi haal hai

koi aainda us se alag hoga kab

saikDon sal ke

roz aur shab se hain

apne mazi ke rishte juDe