rishta-e-dosti

yaum-e-alast kī baat hai

iqrār sabhī jab kar chuke the

ahd bhī pakke ho chuke the

phir unhī tauhīd lamhoñ meñ

ruuh merī ne

sahme sahme jhijhakte lahje

ye jhuk ke apne karīm rab se

kahā ki mālik navāz mujh ko

tavīl tārīk kaThin safar meñ

hayāt jis kā hai naam rakkhā

ik aisā anmol pyārā rishta

dostī hai naam jis kā

ye sun ke har-sū sukūt thā chhāyā

jumūd taarī thā har ek shai par

hairāñ malā.ik ye sochte the

ye ruuh sazā kī hai mustahiq ab

rahīm rab ko jo pyaar aaya

to merī jānib

ik rahmatoñ kā hisār aaya

ye farmān malā.ik ko huā yakāyak

vafā kī miTTī ko gūñdh rakho

phir milāo chāhat kā ūd-o-ambar

be-riyā.ī unDelo is meñ

karo be-laus vafāoñ kā araq shāmil

yak-jān hoñ jab sabhī ye ajzā

to har rūh-e-insāñ meñ kar do shāmil

ye buniyād thī rishta-e-dostī kī

rishtoñ ke is hujūm meñ monā

merī ḳhush-nasībī ki karīm rab ne

dostī ke kitne meherbāñ sitāre

mere āsmān-e-zindagī pe zau-fishāñ kiye haiñ

to ai mehr-o-vafā kī miTTī meñ guñdhe mere dosto

ye nazm merī tumhāre naam

ki mohabbatoñ ne tumhārī mujhe mālā-māl kiyā

aur is dostī ne

merī hastī ko be-misāl kiyā

yaum-e-alast ki baat hai

iqrar sabhi jab kar chuke the

ahd bhi pakke ho chuke the

phir unhi tauhid lamhon mein

ruh meri ne

sahme sahme jhijhakte lahje

ye jhuk ke apne karim rab se

kaha ki malik nawaz mujh ko

tawil tarik kaThin safar mein

hayat jis ka hai nam rakkha

ek aisa anmol pyara rishta

dosti hai nam jis ka

ye sun ke har-su sukut tha chhaya

jumud tari tha har ek shai par

hairan malaik ye sochte the

ye ruh saza ki hai mustahiq ab

rahim rab ko jo pyar aaya

to meri jaanib

ek rahmaton ka hisar aaya

ye farman malaik ko hua yakayak

wafa ki miTTi ko gundh rakho

phir milao chahat ka ud-o-ambar

be-riyai unDelo is mein

karo be-laus wafaon ka araq shamil

yak-jaan hon jab sabhi ye ajza

to har ruh-e-insan mein kar do shamil

ye buniyaad thi rishta-e-dosti ki

rishton ke is hujum mein mona

meri KHush-nasibi ki karim rab ne

dosti ke kitne meherban sitare

mere aasman-e-zindagi pe zau-fishan kiye hain

to ai mehr-o-wafa ki miTTi mein gundhe mere dosto

ye nazm meri tumhaare nam

ki mohabbaton ne tumhaari mujhe mala-mal kiya

aur is dosti ne

meri hasti ko be-misal kiya