rishta gunge safar ka

ye kis janam meñ

ham

dobāra mile haiñ

ye ḳhat

rañg

qad

sab mujhe jānte haiñ

mire lams se āshnā haiñ

maiñ bhaTkā huuñ

kitne sarāboñ meñ sahrāoñ meñ

ka.ī kārvāñ mujh se aage ga.e

un ke naqsh-e-kaf-e-pā abhī mushta.il haiñ

abhī dhuul ne un pe chādar bichā.ī nahīñ hai

mujh se pīchhe

na.e kārvānoñ kī gard uḌā rahī hai

kuchh jiyāle javāñ

tāza-dam tez-rau

aur maiñ

vaqt kī rahguzar kā vo tanhā musāfir

jo har qāfile se alag

rah-ravoñ se alag

ajnabī samt

yuuñ chal rahā hai

ki us ke sivā koī sūrat nahīñ hai

tahayyur se paidā masarrat ke aañsū liye

is tarah ham mile jaise pahle kabhī mil chuke the

kaun se kārvāñ se bhaTaktī huī

tum dobāra idhar aa ga.ī ho

tumheñ kaun sī manzil-e-zindagī kī talab hai

tumhārī ragoñ meñ bhī

merī ragoñ kī tarah

kitnī sadiyoñ kā ḳhuuñ

kitnī nasloñ kā ḳhuuñ

maujzan hai

aur ye saarī nasleñ

shikasta magar ūñchī dīvār kī tarah istāda haiñ

yūñhī kab talak phone par baat karte raheñge

yūñhī fāsla jism kā lams kā

ek rishta faqat saut-o-avāz kā

ye rishta bhī hissa hai gūñge safar kā

jo kab TuuT jaa.e

kise ye pata hai

kaash ye rishta-e-saut-o-āvāz hī dā.imī ho

ki gūñge safar ke sabhī silsile aarzī haiñ

ye kis janam mein

hum

dobara mile hain

ye KHat

rang

qad

sab mujhe jaante hain

mere lams se aashna hain

main bhaTka hun

kitne sarabon mein sahraon mein

kai karwan mujh se aage gae

un ke naqsh-e-kaf-e-pa abhi mushtail hain

abhi dhul ne un pe chadar bichai nahin hai

mujh se pichhe

nae karwanon ki gard uDa rahi hai

kuchh jiyale jawan

taza-dam tez-rau

aur main

waqt ki rahguzar ka wo tanha musafir

jo har qafile se alag

rah-rawon se alag

ajnabi samt

yun chal raha hai

ki us ke siwa koi surat nahin hai

tahayyur se paida masarrat ke aansu liye

is tarah hum mile jaise pahle kabhi mil chuke the

kaun se karwan se bhaTakti hui

tum dobara idhar aa gai ho

tumhein kaun si manzil-e-zindagi ki talab hai

tumhaari ragon mein bhi

meri ragon ki tarah

kitni sadiyon ka KHun

kitni naslon ka KHun

maujzan hai

aur ye sari naslen

shikasta magar unchi diwar ki tarah istada hain

yunhi kab talak phone par baat karte rahenge

yunhi fasla jism ka lams ka

ek rishta faqat saut-o-awaz ka

ye rishta bhi hissa hai gunge safar ka

jo kab TuT jae

kise ye pata hai

kash ye rishta-e-saut-o-awaz hi daimi ho

ki gunge safar ke sabhi silsile aarzi hain