rishta

kal us ne pūchh hī Daalā

tum āḳhir kaun ho mere

hamāre darmiyāñ

jo ik ta.alluq hai

jo rishta hai

vo āḳhir kaun sā hai

naam kyā hai

kuchh batāoge

to maiñ ne kah diyā

rishta vahī hai darmiyāñ apne

jo āñkhoñ kā hai nīñdoñ se

jo nīñdoñ kā hai ḳhvāboñ se

jo ḳhvāboñ kā hai rātoñ se

jo rātoñ kā añdheroñ se

añdheroñ kā sitāroñ se

sitāroñ kā falak se hai

falak kā chāñd-sūraj se

jo sūraj-chāñd kā hai is zamīñ se

aur zamīñ kā peḌ-paudoñ se

havāoñ se ghaTāoñ se

ghaTāoñ kā bahāroñ se

bahāroñ kā hai phūloñ se

jo phūloñ kā hai ḳhushbū se

jo ḳhushbū kā hai bhauñroñ se

jo bhauñroñ kā hai kaliyoñ se

jo kaliyoñ kā hai kāñToñ se

jo kāñToñ kā hai shāḳhoñ se

jo shāḳhoñ kā jaḌoñ se hai

jaḌoñ kā hai jo miTTī se

jo miTTī kā bashar se hai

bashar kā jo ḳhudā se hai

ḳhudā kā nek bandoñ se

aur un bandoñ kā īmāñ se

aur īmāñ kā aqīdat se

aqīdat kā mohabbat se

mohabbat kā diloñ se hai

vahī dil

jo tere siine meñ hai aur mere siine meñ

mohabbat jis ke andar hai

mohabbat kā hasīñ rishta vahī hai darmiyāñ apne

ab is rishte ko koī naam dene kī zarūrat hai

kal us ne puchh hi Dala

tum aaKHir kaun ho mere

hamare darmiyan

jo ek talluq hai

jo rishta hai

wo aaKHir kaun sa hai

nam kya hai

kuchh bataoge

to main ne kah diya

rishta wahi hai darmiyan apne

jo aankhon ka hai nindon se

jo nindon ka hai KHwabon se

jo KHwabon ka hai raaton se

jo raaton ka andheron se

andheron ka sitaron se

sitaron ka falak se hai

falak ka chand-suraj se

jo suraj-chand ka hai is zamin se

aur zamin ka peD-paudon se

hawaon se ghaTaon se

ghaTaon ka bahaaron se

bahaaron ka hai phulon se

jo phulon ka hai KHushbu se

jo KHushbu ka hai bhaunron se

jo bhaunron ka hai kaliyon se

jo kaliyon ka hai kanTon se

jo kanTon ka hai shaKHon se

jo shaKHon ka jaDon se hai

jaDon ka hai jo miTTi se

jo miTTi ka bashar se hai

bashar ka jo KHuda se hai

KHuda ka nek bandon se

aur un bandon ka iman se

aur iman ka aqidat se

aqidat ka mohabbat se

mohabbat ka dilon se hai

wahi dil

jo tere sine mein hai aur mere sine mein

mohabbat jis ke andar hai

mohabbat ka hasin rishta wahi hai darmiyan apne

ab is rishte ko koi nam dene ki zarurat hai