rishwat

log ham se roz kahte haiñ ye aadat chhoḌiye

ye tijārat hai ḳhilāf-e-ādmiyat chhoḌiye

is se bad-tar lat nahīñ hai koī ye lat chhoḌiye

roz aḳhbāroñ meñ chhaptā hai ki rishvat chhoḌiye

bhuul kar bhī jo koī letā hai rishvat chor hai

aaj qaumī pāgaloñ meñ raat din ye shor hai

kis ko samjhā.eñ use khodeñ to phir pā.eñge kyā

ham agar rishvat nahīñ leñge to phir khā.eñge kyā

qaid bhī kar deñ to ham ko raah par lā.eñge kyā

ye junūn-e-ishq ke andāz chhuT jā.eñge kyā

mulk bhar ko qaid kar de kis ke bas kī baat hai

ḳhair se sab haiñ koī do-chār das kī baat hai

ye havas ye chor bāzārī ye mahñgā.ī ye bhaav

raa.ī kī qīmat ho jab parbat to kyuuñ na aa.e taav

apnī tanḳhvāhoñ ke naale meñ hai paanī ādh-pāv

aur lākhoñ Tan kī bhārī apne jīvan kī hai naav

jab talak rishvat na leñ ham daal gal saktī nahīñ

naav tanḳhvāhoñ ke paanī meñ to chal saktī nahīñ

rishvatoñ kī zindagī hai chor-bāzārī ke saath

chal rahī hai be-zarī ahkām-e-zardārī ke saath

phurtiyāñ chūhoñ kī haiñ billī kī tarrārī ke saath

aap rokeñ ḳhvāh kitnī hī sitamgārī ke saath

ham nahīñ hilne ke sun liije kisī bhauñchāl se

kaam ye chaltā rahegā aap ke iqbāl se

ye hai mil vaalā vo baniyā hai ye sāhūkār hai

ye hai dūkāñ-dār vo hai ved ye attār hai

vo agar Thag hai to ye Daaku hai vo baT-mār hai

aaj har gardan meñ kaalī jiit kā ik haar hai

haif mulk-o-qaum kī ḳhidmat-guzārī ke liye

rah ga.e haiñ ik hamīñ īmān-dārī ke liye

bhuuk ke qānūn meñ īmān-dārī jurm hai

aur be-īmāniyoñ par sharmsārī jurm hai

dākuoñ ke daur meñ parhez-gārī jurm hai

jab hukūmat ḳhaam ho to puḳhta-kārī jurm hai

log aTkāte haiñ kyuuñ roḌe hamāre kaam meñ

jis ko dekho ḳhair se nañgā hai vo hammām meñ

toñd vāloñ kī to ho ā.īna-dārī vaah vā

aur ham bhūkoñ ke sar par chāñd-mārī vaah vā

un kī ḳhātir sub.h hote hī nahārī vaah vā

aur ham chāTā kareñ īmān-dārī vaah vā

seTh jī to ḳhuub motor meñ havā khāte phireñ

aur ham sab jūtiyāñ galiyoñ meñ chaTḳhāte phireñ

ḳhuub haq ke āstāñ par aur jhuke apnī jabīñ

jā.iye rahne bhī diije nāseh-e-gardūñ-nashīñ

tauba tauba ham bhaḌī meñ aa ke aur dekheñ zamīñ

aañkh ke andhe nahīñ haiñ gāñTh ke puure nahīñ

ham phaTak sakte nahīñ parhez-gārī ke qarīb

aql-mand aate nahīñ īmān-dārī ke qarīb

is girānī meñ bhalā kyā ġhuncha-e-īmāñ khile

jau ke daane saḳht haiñ tāñbe ke sikke pil-pile

jaa.eñ kapḌe ke liye to daam sun kar dil hile

jab garebāñ tā-ba-dāman aa.e to kapḌā mile

jaan bhī de de to saste daam mil saktā nahīñ

ādmiyat kā kafan hai dostoñ kapḌā nahīñ

sirf ik patlūn silvānā qayāmat ho gayā

vo silā.ī lī miyāñ darzī ne nañgā kar diyā

aap ko ma.alūm bhī hai chal rahī hai kyā havā

sirf ik tie kī qīmat ghoñT detī hai galā

halkī Topī sar pe rakhte haiñ to chakrātā hai sar

aur juute kī taraf baḌhiye to jhuk jaatā hai sar

thī buzurgoñ kī jo banyā.in vo baniyā le gayā

ghar meñ jo gāḌhī kamā.ī thī vo gāḌhā le gayā

jism kī ek ek boTī gosht vaalā le gayā

tan meñ baaqī thī jo charbī ghī kā pyāla le gayā

aa.ī tab rishvat kī chiḌiyā pañkh apne khol kar

varna mar jaate miyāñ kutte kī bolī bol kar

pattharoñ ko toḌte haiñ aadmī ke ustuḳhāñ

sañg-bārī ho to ban jaatī hai himmat sā.ebāñ

peT meñ letī hai lekin bhuuk jab añgḌā.iyāñ

aur to aur apne bachche ko chabā jaatī hai maañ

kyā batā.eñ bāziyāñ haiñ kis qadar haare hue

rishvateñ phir kyuuñ na leñ ham bhuuk ke maare hue

aap haiñ fazl-e-ḳhudā-e-pāk se kursī-nashīñ

intizām-e-saltanat hai aap ke zer-e-nagīñ

āsmāñ hai aap kā ḳhādim to lauñDī hai zamīñ

aap ḳhud rishvat ke zimmedār haiñ fidvī nahīñ

baḳhshte haiñ aap dariyā kashtiyāñ khete haiñ ham

aap dete haiñ mavāqe rishvateñ lete haiñ ham

Thiik to karte nahīñ buniyād-e-nā-hamvār ko

de rahe haiñ gāliyāñ girtī huī dīvār ko

sach batā.ūñ zeb ye detā nahīñ sarkār ko

pāliye bīmāriyoñ ko māriye bīmār ko

illa-e-rishvat ko is duniyā se ruḳhsat kījiye

varna rishvat kī dhaḌalle se ijāzat dījiye

bad bahut bad-shakl haiñ lekin badī hai nāznīñ

jaḌ ko bose de rahe haiñ peḌ se chīñ-bar-jabīñ

aap go paanī ulachte haiñ ba-tarz-e-dil-nashīñ

naav kā sūrāḳh lekin band farmāte nahīñ

koḌhiyoñ par āstīñ kab se chaḌhā.e haiñ huzūr

koḌh ko lekin kaleje se lagā.e haiñ huzūr

dast-kārī ke ufuq par abr ban kar chhā.iye

jahl ke ThanDe lahū ko ilm se garmā.iye

kār-ḳhāne kījiye qaa.em mashīneñ lā.iye

un zamīnoñ ko jo mahv-e-ḳhvāb haiñ chauñkāiye

ḳhvāh kuchh bhī ho munḌhe ye bail chaḌh saktī nahīñ

mulk meñ jab tak ki paidā-vār baḌh saktī nahīñ

dil meñ jitnā aa.e lūTeñ qaum ko shāh-o-vazīr

khīñch le ḳhanjar koī joḌe koī chille meñ tiir

be-dhaḌak pī kar ġharīboñ kā lahū akḌeñ amiir

devtā ban kar raheñ to ye ġhulāmān-e-haqīr

dostoñ kī gāliyāñ har aan sahne dījiye

ḳhāna-zādoñ ko yūñhī shaitān rahne dījiye

daam ik chhoTe se kuuze ke haiñ sau jām-e-bilūr

mol lene jaa.eñ ik qatra to deñ nahr-o-qusūr

ik diyā jo bechtā hai māñgtā hai sham-e-tūr

ik zarā se sañg-reze kī hai qīmat koh-e-nūr

jab ye aalam hai to ham rishvat se kyā tauba kareñ

tauba rishvat kaisī ham chanda na leñ to kyā kareñ

zulf us co-operative silsile kī hai darāz

chheḌte haiñ ham kabhī to vo kabhī rishvat kā saaz

gaah ham bante haiñ qumrī gaah vo bante haiñ baaz

aap ko ma.alūm kyā aapas kā ye rāz-o-niyāz

naav ham apnī khivāte bhī haiñ aur khete bhī haiñ

rishvatoñ ke lene vaale rishvateñ dete bhī haiñ

bādshāhī taḳht par hai aaj har shai jalva-gar

phir rahe haiñ Thokareñ khāte zar-o-la.al-o-guhar

ḳhaas chīzeñ qīmateñ un kī to haiñ aflāk par

āb-ḳhora muñh phulātā hai aTThannī dekh kar

chauda aane ser kī āvāz sun kar āj-kal

laal ho jaatā hai ġhusse se TamāTar āj-kal

nastaran meñ naaz baaqī hai na gul meñ rañg-o-bū

ab to hai sehn-e-chaman meñ ḳhār-o-ḳhas kī aabrū

ḳhurdanī chīzoñ ke chehroñ se Tapaktā hai lahū

rūpa.e kā rañg faq hai ashrafī hai zard-rū

haal ke sikke ko maazī kā jo sikka dekh le

sau ruupe ke note ke muñh par do annī thuuk de

vaqt se pahle hī aa.ī hai qayāmat dekhiye

muñh ko Dhāñpe ro rahī hai ādmiyat dekhiye

duur jā kar kis liye tasvīr-e-ibrat dekhiye

apne qibla 'josh' sāhab hī kī hālat dekhiye

itnī gambhīrī pe bhī mar-mar ke jiite haiñ janāb

sau jatan karte haiñ to ik ghūñT piite haiñ janāb

log hum se roz kahte hain ye aadat chhoDiye

ye tijarat hai KHilaf-e-admiyat chhoDiye

is se bad-tar lat nahin hai koi ye lat chhoDiye

roz aKHbaron mein chhapta hai ki rishwat chhoDiye

bhul kar bhi jo koi leta hai rishwat chor hai

aaj qaumi pagalon mein raat din ye shor hai

kis ko samjhaen use khoden to phir paenge kya

hum agar rishwat nahin lenge to phir khaenge kya

qaid bhi kar den to hum ko rah par laenge kya

ye junun-e-ishq ke andaz chhuT jaenge kya

mulk bhar ko qaid kar de kis ke bas ki baat hai

KHair se sab hain koi do-chaar das ki baat hai

ye hawas ye chor bazari ye mahngai ye bhaw

rai ki qimat ho jab parbat to kyun na aae taw

apni tanKHwahon ke nale mein hai pani aadh-paw

aur lakhon Tan ki bhaari apne jiwan ki hai naw

jab talak rishwat na len hum dal gal sakti nahin

naw tanKHwahon ke pani mein to chal sakti nahin

rishwaton ki zindagi hai chor-bazari ke sath

chal rahi hai be-zari ahkaam-e-zardari ke sath

phurtiyan chuhon ki hain billi ki tarrari ke sath

aap roken KHwah kitni hi sitamgari ke sath

hum nahin hilne ke sun lije kisi bhaunchaal se

kaam ye chalta rahega aap ke iqbaal se

ye hai mil wala wo baniya hai ye sahukar hai

ye hai dukan-dar wo hai wed ye attar hai

wo agar Thag hai to ye Daku hai wo baT-mar hai

aaj har gardan mein kali jit ka ek haar hai

haif mulk-o-qaum ki KHidmat-guzari ke liye

rah gae hain ek hamin iman-dari ke liye

bhuk ke qanun mein iman-dari jurm hai

aur be-imaniyon par sharmsari jurm hai

dakuon ke daur mein parhez-gari jurm hai

jab hukumat KHam ho to puKHta-kari jurm hai

log aTkate hain kyun roDe hamare kaam mein

jis ko dekho KHair se nanga hai wo hammam mein

tond walon ki to ho aaina-dari wah wa

aur hum bhukon ke sar par chand-mari wah wa

un ki KHatir subh hote hi nahaari wah wa

aur hum chaTa karen iman-dari wah wa

seTh ji to KHub motor mein hawa khate phiren

aur hum sab jutiyan galiyon mein chaTKHate phiren

KHub haq ke aastan par aur jhuke apni jabin

jaiye rahne bhi dije naseh-e-gardun-nashin

tauba tauba hum bhaDi mein aa ke aur dekhen zamin

aankh ke andhe nahin hain ganTh ke pure nahin

hum phaTak sakte nahin parhez-gari ke qarib

aql-mand aate nahin iman-dari ke qarib

is girani mein bhala kya ghuncha-e-iman khile

jau ke dane saKHt hain tanbe ke sikke pil-pile

jaen kapDe ke liye to dam sun kar dil hile

jab gareban ta-ba-daman aae to kapDa mile

jaan bhi de de to saste dam mil sakta nahin

aadmiyat ka kafan hai doston kapDa nahin

sirf ek patlun silwana qayamat ho gaya

wo silai li miyan darzi ne nanga kar diya

aap ko malum bhi hai chal rahi hai kya hawa

sirf ek tie ki qimat ghonT deti hai gala

halki Topi sar pe rakhte hain to chakraata hai sar

aur jute ki taraf baDhiye to jhuk jata hai sar

thi buzurgon ki jo banyain wo baniya le gaya

ghar mein jo gaDhi kamai thi wo gaDha le gaya

jism ki ek ek boTi gosht wala le gaya

tan mein baqi thi jo charbi ghi ka pyala le gaya

aai tab rishwat ki chiDiya pankh apne khol kar

warna mar jate miyan kutte ki boli bol kar

pattharon ko toDte hain aadmi ke ustuKHan

sang-bari ho to ban jati hai himmat saeban

peT mein leti hai lekin bhuk jab angDaiyan

aur to aur apne bachche ko chaba jati hai man

kya bataen baziyan hain kis qadar haare hue

rishwaten phir kyun na len hum bhuk ke mare hue

aap hain fazl-e-KHuda-e-pak se kursi-nashin

intizam-e-saltanat hai aap ke zer-e-nagin

aasman hai aap ka KHadim to launDi hai zamin

aap KHud rishwat ke zimmedar hain fidwi nahin

baKHshte hain aap dariya kashtiyan khete hain hum

aap dete hain mawaqe rishwaten lete hain hum

Thik to karte nahin buniyaad-e-na-hamwar ko

de rahe hain galiyan girti hui diwar ko

sach bataun zeb ye deta nahin sarkar ko

paliye bimariyon ko mariye bimar ko

illa-e-rishwat ko is duniya se ruKHsat kijiye

warna rishwat ki dhaDalle se ijazat dijiye

bad bahut bad-shakl hain lekin badi hai naznin

jaD ko bose de rahe hain peD se chin-bar-jabin

aap go pani ulachte hain ba-tarz-e-dil-nashin

naw ka suraKH lekin band farmate nahin

koDhiyon par aastin kab se chaDhae hain huzur

koDh ko lekin kaleje se lagae hain huzur

dast-kari ke ufuq par abr ban kar chhaiye

jahl ke ThanDe lahu ko ilm se garmaiye

kar-KHane kijiye qaem mashinen laiye

un zaminon ko jo mahw-e-KHwab hain chaunkaiye

KHwah kuchh bhi ho munDhe ye bail chaDh sakti nahin

mulk mein jab tak ki paida-war baDh sakti nahin

dil mein jitna aae luTen qaum ko shah-o-wazir

khinch le KHanjar koi joDe koi chille mein tir

be-dhaDak pi kar gharibon ka lahu akDen amir

dewta ban kar rahen to ye ghulaman-e-haqir

doston ki galiyan har aan sahne dijiye

KHana-zadon ko yunhi shaitan rahne dijiye

dam ek chhoTe se kuze ke hain sau jam-e-bilur

mol lene jaen ek qatra to den nahr-o-qusur

ek diya jo bechta hai mangta hai sham-e-tur

ek zara se sang-reze ki hai qimat koh-e-nur

jab ye aalam hai to hum rishwat se kya tauba karen

tauba rishwat kaisi hum chanda na len to kya karen

zulf us co-operatiwe silsile ki hai daraaz

chheDte hain hum kabhi to wo kabhi rishwat ka saz

gah hum bante hain qumri gah wo bante hain baz

aap ko malum kya aapas ka ye raaz-o-niyaz

naw hum apni khiwate bhi hain aur khete bhi hain

rishwaton ke lene wale rishwaten dete bhi hain

baadshahi taKHt par hai aaj har shai jalwa-gar

phir rahe hain Thokaren khate zar-o-lal-o-guhar

KHas chizen qimaten un ki to hain aflak par

aab-KHora munh phulata hai aTThanni dekh kar

chauda aane ser ki aawaz sun kar aaj-kal

lal ho jata hai ghusse se TamaTar aaj-kal

nastaran mein naz baqi hai na gul mein rang-o-bu

ab to hai sehn-e-chaman mein KHar-o-KHas ki aabru

KHurdani chizon ke chehron se Tapakta hai lahu

rupae ka rang faq hai ashrafi hai zard-ru

haal ke sikke ko mazi ka jo sikka dekh le

sau rupe ke note ke munh par do anni thuk de

waqt se pahle hi aai hai qayamat dekhiye

munh ko Dhanpe ro rahi hai aadmiyat dekhiye

dur ja kar kis liye taswir-e-ibrat dekhiye

apne qibla 'josh' sahab hi ki haalat dekhiye

itni gambhiri pe bhi mar-mar ke jite hain janab

sau jatan karte hain to ek ghunT pite hain janab